Për shembjen e Teatrit Kombëtar nuk ka një reagim nga Ambasada Amerikane, madje Aleanca për Mbrojtjen e Teatrit i dërgoi edhe një letër ku i kërkoi hetim ndërkombëtar për shembjen.
Por kryetarja e LSI, Monika Kryemadhi në një intervistë për RTV Ora pyeti Ambasadën Amerikane në Tiranë se përse ka frikë nga shqiptarët, teksa shtoi se ne jemi populli që i duam më shumë.
“Kjo ambasada amerikane e ka shumë problem kur bën opozita protestë, ka frikë. I thotë njerëzve mos dilni. Kur bën qeveria mitingje, thotë dilni. Kur bën shoqëria civile protestë thotë prap mos dilni. Kur ka frikë nga 97% e shqiptarëve, pse do të jetojë dhe punojë me shqiptarët? Kjo Ambasada Amerikane pse ka kaq frikë nga shqiptarët?! Shqiptarët janë populli që i duan më shumë amerikanët dhe që i kanë dashur gjithmonë”, tha Kryemadhi në një prononim për emisionin “360 gradë”.
Sipas Kryemadhit, shumë ambasadorë vijnë në Shqipëri si rezultat i kompanive lobiste për të bërë rolin dhe për të bërë politikat e interesave antishqiptare në Shqipëri.
“Unë i dua shumë ambasadorët dhe stafet diplomatike. Unë jam e para politikane që kam folur kundër ambasadorëve që e kanë parë Shqipërinë si parajsë të parasë, seksit, koncesionit, bizneseve dhe të jesh e bindur që shumë ambasadorë të pushtetshëm në Shqipëri vijnë si rezultat i kompanive lobiste. Ka shumë ambasadorë që kompani lobiste që paguhen me paratë e klaneve anti shqiptare, vijnë në Shqipëri për të bërë rolin dhe për të bërë dhe politikat e interesave antishqiptare në Shqipëri. Sepse të shkatërrosh teatrin kombëtar sot është të shkatërrosh identitetin shqiptar”.
