Katari ka marrë masa shumë të rrepta për të gjithë ata që nuk respektojnë rregullat e vendosura, për frenimin e pandemisë së koronavirusit.
Sipas mediave arabe, kushdo që nuk do të vendosë maskë në vende publike në Katar rrezikon deri në 3 vite burg, ose gjoba që mund të shkojnë deri në 55 mijë dollarë.
Të vetmit që përjashtohen nga ky ligj, janë drejtuesit e makinave të cilët nuk e kanë të detyrueshme vendosjen e një maske.
Autoritetet e Katarit kanë thënë se tubimet gjatë muajit të ramazanit mund të kontribuojnë në rritjen e infektimeve.
Ndërkohë, shkollat, xhamitë, qendrat tregtare dhe restorantet në Katar do të vijojnë të jenë të mbyllura. Ndërsa punimet për stadiumet që do të presin botërorin e futbollit 2022 do të vazhdojnë.
Me një popullsi prej vetëm 2 milionë e 700 mijë banorësh, Katari regjistron më shumë se 30 mijë raste pozitive me koronavirus, pra rreth 1% e popullsisë.
Katari është mes shteteve me përqindjen më të lartë të infeksioneve në botë, edhe pse deri më tani, vetëm 15 persona kanë humbur jetën si pasojë e COVID-19.
