Avokati Spartak Ngjela shprehet pro shembjes së godinës së Teatrit Kombëtar, duke e cilësuar atë jo funksionale.
Duke e konsideruar një turp për nga infrastruktura, Ngjela thotë për Ora News se kjo ka qenë arsyeja dhe pse ka rënë niveli i dramaturgjisë.
Por ndërsa kërkon ndërtimin e një Teatri të ri, avokati thotë se nëse shteti nuk ka 150 mln euro për të bërë një gjë madhështore të mos e marrë këtë nismë fare.
“Me 20 mln dollarë, sa ç´është parashikuar, nuk ndërtohet një kasolle”, thotë ai.
Ngjela shprehet se ajo sallë është turp për të qenë Teatër Kombëtar.
“Ajo sallë dekadente është bërë shkak edhe për rënien e nivelit të dramaturgjisë në Shqipëri, sidomos në Tiranë. Ka qenë sëmundje e vjetër që Tirana ka qenë pa teatër dramatik.
Komunizimi nuk ja ka lejuar asnjë herë, ka bërë në Fier teatër modern, në Korçë, në Shkodër, në Tiranë jo. Tiranën e la në një gjendje të tillë. Zyra ime ka shkuar në një shfaqje në dimër dhe u sëmur me grip, u ftoh, ishte pa ngrohje. Unë e dija, nuk shkoj.
Nuk është një qendër për lojë dramatike, por brenda ka historinë e vet të madhe. Është diçka tjetër. Nuk e kanë krijuar trupat e 30 viteve, por trupat e mëdha që themeluar Teatrin shqiptar. Nëse duan të ndërtojnë duhet të bëjnë një vepër madhështore. Me 20 mln dollarë siç thonë këta nuk bëjnë dot një teatër por do të bëjnë një kasolle. Teatri do 150 mln euro, nëse nuk i kanë më mirë të mos e ngrenë”, tha Ngjela.
