Regjisori Edmond Budina dhe aktori Neritan Liçaj kanë reaguar ashpër sot ndaj Kryeministrit Edi Rama dhe Kryebashkiakut Erion Veliaj, lidhur me çështjen e Teatrit Kombëtar.
Regjisori, Edmond Budina, apeloi Veliajn të mos bëjë marrëzira se do të ketë përballë popullin e Tiranës.
“Populli i Tiranës e tregoi shumë mirë në kohën e tërmetit sesi nuk shkoi te Bashkia por erdhi te Teatri Kombëtar. Prandaj u them thirrini mendjes, mos bëni marrëzira, se ne do të jemi atje, populli i Tiranës do të jetë atje. Kaq.
Ne jemi qytetarë të lirë që nuk bëjmë pjesë në asnjë parti politike por është dhe e drejtë e gjithëkujt që të jetë anëtar i një partie dhe të mbështesë qytetarinë. Ne ju bëjmë thirrje edhe qytetarëve që janë me bindje të majta, nuk mbrohet as PD, as LSI dhe as opozita por kultura shqiptare, dinjiteti kombëtar, dinjiteti i qytetarisë shqiptare. Nuk kemi të bëjmë thjesht me një Teatër por rënien e demokracisë.
Tregimi i forcës prej tyre tregon se jemi në një shtet dhune në një kohë që nuk funksionojnë gjykatat, gjithçka është në dorën e pushtetit, ky është një moment tepër i vështirë për të gjithë qytetarët. Ne do të jemi atje.Do të reagojmë sipas reagimit që do të bëjnë ata. Gjithë opozita, njerëzit opozitarë të Shqipërinë do të jenë me ne”, tha Budina.
Por, më i ashpër ishte aktori Neritan Liçaj, i cili i bëri të qartë kryeministrit Rama se meqë çështjen e Teatrit Kombëtar e ka kthyer në personale, “bujrum” në fushën e betejës.
“Kisha një mesazh për kryeministrin e rraskapitur. Teatri është tempulli i fjalës së lirë, tempulli i mendimit qytetar, intelektualit, i besimit fetar, i besimit politik, është flamuri kuqezi, është ndjenja kombëtare. Kur ai zotëria atje mendon se mund të luajë me dy flamuj kuqezi se janë dy teatro kombëtarë, ai luan me ekzistencën e kombit tonë dhe ekzistenca e kombit tonë o i rraskapituri i Surrelit varet nga ne dhe ai atje lart. Por ti po e çon në personale, atëherë bujrum të përplasemi ose ti, ose ne. Të jesh i bindur që nuk do të fitosh. Nuk keni parë gjë akoma!”, tha Liçaj.
Deklaratat Budina dhe Liçaj i bënë pas takimit që patën me kreun e PD, Lulzim Basha.
