Deputeti socialist, Ilir Beqaj, bëri një deklaratë të pazakontë këtë të Enjte, teksa iu përgjigj akuzave të një kolegu opozitar i cili tha se Beqaj nuk shkonte asnjëherë në zonën e tij elektorale, duke i braktisur zgjedhësit.
Beqaj u përgjigj se nuk ka fare rëndësi nëse shkon apo jo atje, në zonën e zgjedhur për të përfaqësuar qytetarët.
Ai shtoi se e rëndësishme është që Dibra është më pak e prekur nga pandemia e koronavirusit, edhe pse duhet thënë se në këtë pikë vështirë se mund të gjendet ndonjë lloj merite personale e ish-Ministrit të përfolur e të akuzuar për korrupsion masiv me tendera.
“Kam fatin e madh të jem deputeti i Qarkut të Dibrës, në një kohë kur pas 30 vitesh po ndërtohet rruga e Arbërit, duke e bërë këtë një realitet të ri. Shkoj apo jo në Dibër, ka shumë pak rëndësi. Rëndësi ka që sot Qarku i Dibrës është më pak i prekur nga pandemia e koronavirusit. këtu askush nuk vjen me emër individual. Këtu ka 30 vjet parlamentarizëm dhe unë kam eksperiencën time modeste me 10 vjet”, tha Beqaj.
Kujtojmë se më herët, ish-ministri propozoi uljen e pagave për përballimin e krizës së shkaktuar nga pandemia, deklaratë që shkaktoi mjaft debat, dhe që nga e cila u distancuan dhe vetë socialistët.
