Gary Neville ka zbuluar se si Carlo Tevez e ka zhgënjyer atë me sjelljet e tij gjatë sezonit 2008-2009. Ish-mbrojtësi i Man.United e akuzon argjentinasin se “tradhtoi” vlerat e klubit duke hequr dorë nga gjithçka.
Ndërsa ka folur për “Sky Sports”, ish-lojtari i kombëtares angleze ka deklaruar: “Ajo çfarë më acaroi totalisht nga Carlos Teves është që në sezonin e tij të dytë në klub ai hoqi dorë nga gjithçka. Vinte gjithmonë vonë në stërvitje, tregonte mungesë të theksuar korrektësie në ambientet e klubit, me pak fjalë tradhtoi vlerat e Man.United.
“Nuk mund ta duroja atë situatë. Unë personalisht merrja frymë për klubin në ato kohë, nuk mendoja për asgjë tjetër dhe më pas shikoja veprimet e Teves. Nuk mund ta besoja.”
“Vetëm ideja që dikush futej në dhomat e zhveshjes dhe nuk ishte i gatshëm të jepte maksimumin më bezdiste. E kuptoj se ai mund të ketë pasur arsyet e tij por mendoj stafi i tij, njerëzit që kishte përreth e këshillonin të vepronte ashtu.”
“Ai donte të largohej nga klubi. Unë nuk e kisha problem që lojtarët të largoheshin nga klubi por ka një mënyrë për ta bërë atë. Për lojtarë të mëdhenj si Cristiano Ronaldo dhe Ruud van Nistelrooy erdhi një moment kur nuk donin të qëndronin më, por ata ishin profesionistë deri në sekondën e fundit.”
