Skuadrat në Itali kanë nisur stërvitjen e diferencuar, ndërsa në datë 18 maj pritet që skuadrat të fillojnë stërvitjen në grup.
Por pavarësisht këtyre lajmeve pozitive, data e rifillimit të futbollit në Itali ende ka pikëpyetje të mëdha pasi asgjë nuk është vendosur.
Së fundmi Federata Italiane e Futbollit ka bërë edhe ndryshimet e rekomanduara nga qeveria në protokollin e sigurisë dhe e ka dorëzuar atë pranë ministrive italiane të Shëndetësisë dhe të Sporteve.
Zv.Sekretari i Shëndetit Publik, Mario Zampa, deklaroi se ndryshimet në protokoll ishin të domosdoshme dhe se nuk duhet vënë në rrezik jeta e askujt.
“Flitet për humbje të mëdha nëse nuk rifillon kampionati, por protokolli është shumë i rëndësishëm për të ruajtur jetën e njerëzve. Kemi vendosur që klubet të qëndrojnë të izoluara dhe nëse një lojtar i vetëm do të rezultojë pozitiv, atëherë do të ndërpritet kampionati për të paktën dy javë”, deklaroi Zampa.
Tani mbetet në dorë të dy ministrave përkatës, Speranza e Spadafora, që të ulen në tryezë me kryeministrin Conte dhe Komitetin Teknik të menaxhimit të pandemisë, për të vendosur një datë për rifillimin e kampionatit italian.
