Raporti i KLP/ Gjatë 2019, 5 prokurorë kërkuan mbrojtje. Prokuroria e Përgjithshme nuk ka kryer asnjë hetim disiplinor

Gjatë vitit 2019, 5 prokurorë kërkuan të vihen në mbrojtje, me argumentin se janë ndjerë të kërcënuar gjatë ushtrimit të detyrës.

Dy nga prokurorët që janë vënë në mbrojtje janë pjesë e Prokurorisë së Posaçme anti-Korrupsion që duhet të hetojë zyrtarë dhe ish-zyrtarë të lartë dhe anëtarë të grupeve kriminale.

Sipas të dhënat të publikuara në raportin vjetor të Këshillit të Lartë të Prokurorisë drejtuar Kuvendit, një tjetër shqetësim është mungesa e mjediseve, numri kufizuar i stafit, si dhe mungesa e inspektimeve apo hetimet disiplinore në radhët e prokurorëve.

Sipas KLP-së, gjatë 2019 janë larguar 52 prokurorë dhe kjo ka shkaktuar problem në funksionimin e organit të akuzës.

“Në strukturën e sistemit prokurorial në të gjithë Shqipërinë janë të planifikuar për nevoja të sistemit në total 336 prokurorë. Ndërkohë gjendja faktike e tyre rezulton 284 prokurorë deri më datë 31.12.2019.

LEXO EDHE  Arti shqiptar në zi, ndërron jetë këngëtari i njohur

Diferenca prej 52 prokurorësh tregon vakanca në sistem që kanë ardhur për disa arsye, ndër më kryesoret dhe që kanë ndikuar dukshëm në pengimin e punës së prokurorive është largimi si rezultat i rivlerësimit kalimtar të magjistratëve prokuror nga organet e KPK dhe KPA”, thuhet në raportin e KLP-së.

Sipas raportit të KLP, gjatë 2019-s në adresë të Këshillit të Lartë të Prokurorisë kanë mbërritur 280 denoncime për shkelje të kryera nga prokurorët e të gjitha shkallëve dhe 38 prej tyre janë referuar në Prokurorinë e Përgjithshme.

Në raport thuhet se nga Janari deri në Dhjetor 2019, Prokuroria e Përgjithshme nuk ka kryer asnjë hetim disiplinor ndaj prokurorëve.