Kanë dalë sërish në protestë edhe këtë të martë, banorët e lagjes “Subash” në Krujë. Ata janë kundër shembjes së banesave të tyre.
Për mediat ata shprehen se në këtë mënyrë po prishet trashëgimia dhe kërkojnë zhvendosjen e projektit të rindërtimit në një tjetër zonë.
“Ne do t’i shkojmë në kryeministri. I dashur kryeministër do të vijomë në shtëpi nëse na detyron, do të vijmë në shtëpi. Derisa ti na prish shtëpinë tonë ne do vijmë në Surrel në shtëpinë tënde. Ne nuk dalim në mes të 4 rrugëve. Keni shtëpi aty, keni një lagje 500 – vjeçare. Monument kulture nuk keni vetëm kalaja, nuk është pazari i vjetër. Monumentet e kulturës fillojnë që nga themelet e Krujës, lagjet e Krujës, lagjja “Subash”, u shpreh një banore e lagjes.
“Është dita e dytë që i bëhet thirrje kryetarit të bashkisë Krujë që të jetë prezent në një takim. Si është marrë vendimi, çfarë do bëhet më tutje që ta anulojmë këtë vendim që na cënon shtëpitë tona. Do të ndjekim hapat e tjerë, Bashkia e Krujës po na injoron, ne nuk kemi pse ta respektojmë më. Hapat e tjerë po konsultohemi me ekspertët që të merren në mënyrën e duhur“, tha një banor.
