Pas largimit të Zvonimir Boban, u duk se radhën për t’u larguar nga Milani e kishte ish-mbrojtësi legjendar Paolo Maldini, aktualisht në rolin e drejtuesit teknik të skuadrës.
Por siç konfirmojnë mediat italiane së fundmi, Maldini ka vendosur të qëndrojë deri në fund të sezonit dhe është treguar i hapur për të vijuar bashkëpunimin me kuqezinjtë, por me një kusht thelbësor. Bëhet fjalë për lirinë në vendimmarrje, të paktën për aq sa i takon rolit që ka në skuadër dhe në Milano janë të bindur që nëse në pankinën kuqezi do të ulet gjermani Ralf Rangnick, atëherë nuk do të ketë vend për Maldinin te Milani.
Kjo pasi tekniku gjerman ka kërkuar që të ketë gjithçka nën kontroll te kuqezinjtë për sa i përket afrimit dhe largimit të lojtarëve, diçka kjo që nuk I ka pëlqyer aspak Maldinit, pasi do të nxirrte atë nga kompetencat e tij. Madje ish-mbrojtësi ka dalë hapur kundër Rangnick duke thënë: “Duke folur për kontroll të plotë, ai po u merr fushën disa profesionistëve, që punojnë me kontratë për të mirën e klubit. Mendoj që duhet të mësojë konceptet bazë të respektit, para se të përmirësojë italishten”.
