Dritan Hila, një ish-zv.ministër i qeverisë Rama, sot drejtues i një emisioni, në një postim në rrjetet sociale preferoi ti quajë idiotë ata që protestonin, njëkohësisht edhe ata që mendojnë se ai po i shërbente Edi Ramës.
Postimi i Hilës ka shkaktuar një seri reagimesh, disa prej të cilave ironike ndaj tij.
Por Hila i ka qëndruar idesë se në kohë pandemie njerëzit nuk duhet të protestojnë, pasi në të kundërt “armiku i padukshëm” siç e quan ish-shefi i tij Kryeministër, mund të bëjë gjëmën.
Megjithëse postimet e tij nuk duhen marrë shumë seriozisht, po të kihen parasysh deklaratat në kohën kur ishte zv.ministër i Mbrojtjes.
Ishte koha kur thasët me kanabis transportoheshin edhe me avionë, ndërsa Hila në atë kohë u shfaq diku nga baza e Gjadrit dhe tha se në pistën atje nuk mund të uleshin avionë pasi kishte ca zhavorr të shpërndarë që nuk lejonte avionët të uleshin.
Pak ditë pas deklaratës, FA vendosën disa pengesa betoni mbi pistë që realisht e nxirrnin jashtë funksionit atë.
Gjithsesi përballë dhunës dhe tërheqjes zvarrë që policia i bëri protestuesve dje në sheshin Skënderbej, Hila u shfaq si një shërbyes i devotshëm i të vetmit person që mund të jetë kënaqur nga pamjet e djeshme, dhe që sot në mëngjes u zgjua i relaksuar duke publikuar edhe pamjet nga Ujvara e Shëngjergjit.
Përtej këtyre, një përgjigje ndaj Hilës e ka dhënë njeriu i memeve, Gens Sejko. Ai ka preferuar të publikojë një dokument të vitit 1973. Është një fletë lavdërimi që i jepej oficerit Ylli Hila, babait të Dritan Hilës, nga zv.ministri i Punëve të Brendshme, Feçor Shehu.
Fleta e lavdërimit i jepej për punën e lodhshme, këmbëngulëse, të zgjuar, që ai kishte bërë ndaj të dënuarve të Spaç, duke zbuluar grupin e rrezikshëm armiqësor.
“Lexova statusin e Dritan Hilës e mu kujtua një shprehje shkodrane.
‘Ba me kenë ma i mirë korite babën”, shkruan Sejko në reagimin e tij, duke postuar edhe fletën e lavdërimit për babain e Hilës.
Ndoshta pas etiketimeve kundër protestuesve, edhe Dritan Hila mund të ketë fatin që të marrë një fletë lavdërimi nga “feçorët e rinj”, zv.ministrat e Lleshajt, ose nga ish-kolegët e tij.
