Vincenzo Spadafora, Ministri italian i Sportit, për të disatën herë shpreh dyshimet e tij mbi mundësinë e rifillimit të futbollit në Itali.
Përpara se skuadrat të rinisin stërvitjen nëpër fushat e lojës, të gjithë lojtarët dhe stafet teknike që përbëjnë një skuadër, i janë nënshtruar testeve për coronavirus dhe raste pozitive janë konfirmuar te skuadra e Torinos, Fiorentinës, Sampdorias ndërsa së fundmi raportohet edhe te Milani.
Duke folur për SeilaTV Bergamo, Spadafora, ka deklaruar: “Lajmet për infektimin e lojtarëve apo pjesëtarëve të klubeve gjatë ditëve të fundit nuk është aspak gjë e mirë”.
“Deri sa të mësojmë plotësisht se si është gjendja te skuadrat, nuk mund të japim asnjë përgjigje për rifillimin e futbollit. Ajo çfarë ka ndodhur këto dy ditët e fundit sigurisht që nuk e ndihmon situatën.”
“Javën tjetër, para 18 majit, ne do të jemi në gjendje të analizojmë kurbën dhe statistikat e virusit pas lehtësimit të masave të bllokimit. Komiteti shkencor së shpejti do të japë verdiktin e tij në protokollin mjekësor të Federatës së Futbollit (FIGC).”
“Dua të sqaroj se kjo është një mundësi për futbollin dhe të gjithë sportin të rishqyrtojnë listën e tyre të prioriteteve dhe stilit të jetës. Kushdo që po tallet me veten se ne thjesht mund të kthehemi drejt normalitetit, nuk e ka kuptuar qartë situatën në të cilën ndodhet globi”.
