Vijojnë të rriten rastet me COVID-19 në Krujë. Mësohet se gjatë 24 orëve të fundit, tre personave kanë rezultuar pozitiv me koronavirusin e ri në 43 testime të kryera.
Kruja mbetet bashkia e dytë në vend me numrin më të lartë të të infektuarve aktivë, pas Tiranës. Sipas të dhënave që dha një ditë më parë Ministria e Shëndetësisë, 62 persona janë aktualisht të infektuar me COVID në Krujë.
Ndërkohë, në të gjithë vendin aktualisht janë 199 persona aktivë me COVID-19.
Javën e ardhshme, është njoftuar një lehtësim i masave shtrënguese, të marra sipas autoriteteve, me qëllim parandalimin e përhapjes së COVID. Disa biznese, që deri më tani kanë qenë të mbyllura për shkak të masave të marra pas identifikimit të rasteve të para me COVID në vend, do të hapen nga e Hëna.
