Lëvizja Vetëvendosje ka dërguar në Kushtetuese komentet në lidhje me kërkesën e Gjykatës Kushtetuese, për dekretin e shpallur nga presidenti Hashim Thaçi për Avdullah Hotin kryeministër.
Anëtarja e Kryesisë së Vetëvendosjes, Arbërie Nagavci ka deklaruar para mediave se shkeljet e Presidentit janë të shumta dhe se besojnë se argumentet juridike janë në anën e tyre.
“Sapo dorëzova në Gjykatën Kushtetuese komentet e mija në lidhje me kërkesën e gjykatës për rastin e iniciuar nga grupi parlamentar i Vetëvendosjes në lidhje me dekretin e presidentit Thaçi. Shkeljet e presidentit janë te shumëfishta dhe të rënda ne besojmë fuqishëm se te gjitha argumentet juridike janë në anën tonë”, ka thënë ajo.
Në një njoftim për media, thuhet se “ndër të tjera, bazuar në argumentet e paraqitura iu kërkua Gjykatës që të shpallë kërkesën të pranueshme dhe të shpallë dekretin e Presidentit nr.24/2020 të pavlefshëm dhe në kundërshtim me nenet 4.1, 84.4 dhe 84.14 të Kushtetutës së Republikës së Kosovës”.
Më herët gjatë ditës, komentet u dorëzuan edhe nga LDK-ja, VV-ja, presidenti Thaçi e kryeparlamentarja Vjosa Osmani.
