Organet drejtuese të sportit të tenisit, kanë njoftuar se është krijuar një fond për t’i ardhur në ndihmë sportistëve më të goditur nga pandemia e coronavirusit.
Kështu federatat e ndryshme që u bashkuan në një iniciativë të tillë janë ATP dhe WTA që organizojnë aktivitetet respektivisht për tenistët dhe tenistet, Federata Ndërkombëtare e Tenisit ITF si dhe katër turnetë e Grand Slam-it, Australian Open, Roland Garros, Wimbledon dhe US Open. Në këtë iniciativë është bërë e mundur mbledhja e më shumë se 6 milionë euro.
Të gjithë bashkuan forcat për të grumbulluar para në një fond të veçantë të krijuar enkas, për të ndihmuar dhe mbështetur sportistët në vështirësi, që këto kohë po përballen me sfidat e jashtëzakonshme dhe pasojat që ka shkaktuar virusi COVID-19.
Virusi ka shkaktuar paqartësi të mëdha në kalendarin e sezonit të Tenisit, me Wimbledon që është anuluar për herë të parë që nga Lufta e Dytë Botërore dhe French Open që u shty deri në fund të shtatorit.
Ndërkohë Shoqata e Tenisit në Shteteve të Bashkuara do të vendosë në mesin e qershorit nëse US Open do të zhvillohet apo jo në New York.
