Një 27-vjeçar është arrestuar nga policia, pas denoncimit të një qytetari në Komisariatin Dixhital.
Ai ushtronte veprimtari kriminale në fushën e narkotikëve dhe shitjes e mbajtjes pa leje të armëve dhe municioneve.
Në pranga është vënë shtetasi Gentjan Demiri, 27 vjeç, banues në Tiranë.
Qytetari kishte denoncuar në polici se ky shtetas, në rrugën “Irfan Tomini”, shiste drogë, armë luftarake dhe sportive.
Gjatë kontrollit të ushtruar në banesën e këtij shtetasi, shërbimet e Policisë gjetën në cilësinë e provës materiale një dorezë metalike (Përforcues grushti), një shkop shufër metalike me tri hapje, një shkop gome me hapje si ata të Policisë, një armë gjahu çifte dhe municion luftarak.
Materialet do t’i kalojnë Prokurorisë së Rrethit Gjyqësor Tiranë, për veprat penale “Prodhimi dhe mbajtja pa leje armëve të gjuetisë dhe sportive”,”Prodhimi, mbajtja, blerja apo shitja pa leje armëve të ftohta” dhe “Mbajtja pa leje e armëve shpërthyese dhe municioneve”.
