Duke filluar nga nesër, datë 4 Maj, do të shtohen “zonat e gjelbërta” edhe në bashkitë ku ka risk të ulët të transmetimit të infeksionit. Kjo u bë e ditur nga Ministria e Shëndetësisë.
Gjithashtu u njoftua se në të gjithë vendin do të lejohet shërbimi taksi për udhëtimet ndërqytetase me deri dy pasagjerë, anëtarë të një familjeje.
Po kështu, të riatdhesuarit që janë me banim në zonat e kuqe do të vetëkarantinohen në banesë.
Në përditësimin e sotëm, Ministria e Shëndetësisë bëri me dije se gjatë 24 orëve të fundit janë konfirmuar 6 raste të reja.
“Që nga fillimi i epidemisë deri më sot janë konfirmuar pozitivë me COVID-19 në të gjithë vendin 795 qytetarë, por në këto momente pothuajse 67 % e tyre rezultojnë të shëruar.
Gjatë 24 orëve të fundit një tjetër zonë e Shqipërisë rezulton me risk të ulët për transmetim të infeksionit, që është Fieri dhe numri total i të shëruarve shkon në 531”, sqaroi Gentiana Qirjako në emër të Ministrisë së Shëndetësisë.
