Një person është vënë në pranga në Kosovë pasi dyshohet se ka kërcënuar me jetë familjen e ish-ministrit të Jashtëm të Kosovës Behgjet Pacollit. Lajmin e ka bërë të ditur këshilltari i Pacollit, Naim Murseli.
Sipas këtij të fundit, personi i arrestuar ka kërcënuar se do t’i djegë fëmijët e Pacollit dhe gjithashtu i ka kërkuar edhe para. Murseli thotë gjithashtu se personi me iniciale E.H, i cili është prezantuar si prokuror, e ka kërcënuar kreun e AKR-së.
Murseli shkroi:
“Personi i arrestuar në orët e vona mbrëmë, me incialet E.H, i cili kërcënoi z. Pacolli dhe fëmijët e tij i ka kërkuar gjithashtu para. Personi ka pretenduar të jetë edhe prokuror i Kosovës. Ai ka kërcënuar po ashtu me arrestim të z. Pacolli. E.H ka kërkuar në internet shkollën e fëmijëve, e cila është shkollë publike, të z. Pacolli dhe ka kërcënuar atë se do t’i rrëmbejë dhe do t’i djeg ata për së gjalli. Z. Pacolli është shumë i tronditur dhe i mërzitur emocionalisht nga kërcënimet e bëra.”
Pacolli ka angazhuar avokatët e tij për të ndjekur çështjen ndaj atyre që përdorin gjuhë urrejtjeje, fyese e kërcënuese.
