Drejtori sportiv i Juventusit, Fabio Paratici, në një intervistë për mediat italiane foli për merkaton në hyrje të klubit bardhezi, por edhe për lojtarët aktualë në skuadër dhe për rinovimet e mundshme të kontratave.
Paratici zbuloi se dy veteranët e skuadrës, Giorgio Chiellini dhe Gianluigi Buffon, do të jenë pjesë e Juves edhe sezonin e ardhshëm, pasi kontratat e reja të tyre janë shumë pranë formalizimit.
“Shumë shpejt kapiteni Chiellini dhe portieri Buffon do të rinovojnë zyrtarisht me Juventusin”, theksoi Paratici.
Ai foli edhe për Paulo Dybalan rinovimi i të cilit ishte në rrugë të mbarë deri në momentin e ndërprerjes së gjithçkaje nga COVID-19.
Paratici shtoi se dëshira e të dyja palëve si e klubit ashtu edhe e futbollistit është të vazhdojnë bashkëpunimin, me Dybalan, që kërkon të qëndrojë gjatë te kampionët e Italisë dhe në momentin që situata do të qetësohet nga Koronavirusi, palët do të rinisin bisedimet dhe rinovimi do të vijë.
