Nga Boldnews.al
Arrestimi në Tiranë i të dyshuarit për terrorizëm Komron Zukhurov mendohet se ka qenë rastësi, pavarësisht se Policia e Shtetit deklaroi mesjavën e kaluar se ai shtetasi nga Taxhikistani u prangos në kuadër të operacionit “Vizitori”.
Burime zyrtare nga Policia e Shtetit njoftuan të Mërkurën se kishin organizuar një operacion për ndalimin e Zukhurovit, ndaj të cilit autoritetet gjermane kishin lëshuar një urdhër-kërkimi ndërkombëtar, i dyshuar si pjesë e një celule terroriste të ISIS.
Ndërkohë, burime konfidenciale për “Boldnews.al” deklaruan se arrestimi i Zukhurovit nuk duket se ka qenë pjesë e një operacioni. Ai është arrestuar pasi ishte paraqitur në policinë e kryeqytetit, për të shtyrë afatin e vizës 2-mujore të qëndrimit në Shqipëri.
Komron Zukhurov, i cili dyshohet nga drejtësia gjermane se ishte pjesë e planeve terroriste, ka hyrë në Shqipëri në mënyrë të rregullt, në shkurt 2020.
Ai është pajisur me një vizë nga Ambasada e Shqipërisë në Rusi, pak kohë para se ndaj tij të lëshohej urdhër-arresti ndërkombëtar.
Në përfundim të afatit 2-mujor, sipas burimeve të “Boldnews.al”, Zukhurov ka kërkuar nga autoritetet shqiptare shtyrjen e lejes së qëndrimit, me argumentin e bllokimit të lëvizjes për shkak të mbylljes së pikave kufitare si pasojë e pandemisë Covid-19.
Por, shtetasi taxhik është përballur me një surprizë të hidhur. Ndaj tij, autoritetet gjermane kishin lëshuar urdhër-kërkimin që në 21 Prill 2020 dhe ai u prangos, me qëllim ekstradimin drejt Gjermanisë.
Të shtunën e kësaj jave, gjykata e Tiranës caktoi masën e sigurisë arrestit të përkohshëm për Komron Zukhurov, në pritje të dokumentacionit të plota nga gjykata gjermane.
Autoritetet e drejtësisë në Gjermani kanë informuar Policinë Shqiptare se kanë të dhëna të bollshme për aktivitetin me frymë terroriste të shtetasit nga Taxhikistani, i arrestuar së fundmi në Tiranë.
Zykhurov dyshohet se ka marrë pjesë si luftëtar i huaj në grupimin terrorist ISIS. Sipas të dhënave të autoriteteve gjermane, Zukhurov, së bashku me disa bashkëkombas të tij, të nxitur nga një frymë radikalizmi fetar, kanë krijuar në Gjermani një celulë, të gatshme për “Jihad”.
Kjo celulë, sipas autoriteteve gjermane, kishte planifikuar të kryente sulme të natyrës terroriste, kundër atyre që i konsideronin “jo-besimtarë” në Gjermani, por edhe në vende të tjera.
Nuk ka asnjë të dhënë zyrtare, të paktën deri më tani, që të dëshmojnë se ky grup kishte planifikuar veprime kriminale në Shqipëri.
