Guvernatori i Kalifornisë po rikthen masa të distancimit fizik. Pas një fundjave që u shoqërua me turma në plazhet e këtij shteti, guvernatori Gavin Newsom ka dhënë urdhër që duke filluar që të premten plazhet dhe parqet publike të mbyllen.
Masat pritet të irritojnë shumë banorë. Disa komunitete lokale kanë kërcënuar se do ta sfidojnë në gjyq urdhrin.
Sipas Qendrës për Kontrollin dhe Parandalimin e Sëmundjeve, Kalifornia është një ndër pesë shtetet amerikane me numrin më të lartë të rasteve të konfirmuara me koronavirus. Deri tani numërohen mbi 50 mijë të infektuar dhe mbi 1880 viktima.
Departamenti i shëndetit në Kaliforni e cilëson si “të përhapur gjerësisht” problemin e virusit në këtë shtet.
Sipas së përditshmes Los Angeles Times, pritet që rastet me koronavirus të dyfishohen çdo 21.7 ditë, megjithëse parqet, plazhet dhe mjedise të tjera publike për zbavitje janë mbajtur të mbyllura edhe më parë.
