Ministria e Shëndetësisë dhe Mbrojtjes Sociale ka vendosur një linjë jeshile për këshillim psikologjik falas për çdo qytetar që ka shenja ankthi, frike apo pasigurie të shkaktuara nga COVID19.
Numri ku mund të telefoni është 0800 40 40, përmes të cilit çdo qytetar ka marrë informacione edhe për barnat me rimbursim dhe kontaktet me mjekun e familjes.
Shërbimi i ri që shtohet është për këshillim për probleme psikologjike të shkaktuara si pasojë e COVID19, për ankthin, frikën, stresin, ku psikologë të çertifikuar do të ofrojnë shërbim profesional dhe të sigurtë nga ora 08:00- 22:00.
Duket se pas më shumë se 6 javësh aplikimi të karantinimit të detyruar, Ministria e Shëndetësisë ka kuptuar se shumë qytetarë mund të kenë nevojë edhe për këshillat e një psikologu.
Që nga fillimi dhe deri tani në linjën e gjelbër janë pritur 82 000 thirrje.
Urgjencat për sëmundjet, përfshi edhe COVID-19 do të vijojnë të referohen në numrin e Urgjencës Kombëtare 127!
