Është arrestuar 57-vjeçari Hekuran Met’Hoxha, i cili mbrëmjen e djeshme në lagjen “5 shtatori në Skrapar qëllonte me armë zjarri në ajër, duke mos iu bindur urdhërit të uniformave blu për të ndaluar, madje kur pa këta të fundit qëlloi dhe në drejtim të tyre.
Pas 4 orësh rezistencë, rreth orës 01:00 falë ndërhyrjes së forcave “Renea” u bë e mundur vënia në pranga e 57-vjeçarit dhe u sekuestrua edhe arma kallashnikov, bashkë me një sasi municioni.
Mësohet se ai është me probleme të shëndetit mendor.
Ky shtetas, në orët e mbrëmjes së djeshme, në katin e parë të një pallati, ka qëlluar në ajër me armë zjarri dhe më pas kur ka parë shërbimet e Policisë ka qëlluar edhe në drejtim të tyre. Më vonë, ky shtetas u fut në banesë dhe nuk iu përgjigj thirrjeve të Policisë për t’u dorëzuar.
Shërbimet e Policisë morën masa sigurie dhe rrethuan pallatin. Në ndihmë të Policisë vendore shkuan shërbimet e Drejtorisë Vendore të Policisë Berat dhe më pas forcat speciale “Renea”.
Materialet i kaluan Prokurorisë, për veprime të mëtejshme.
