Bujar Mehmeti, 60-vjeç ka ndërruar jetë në Vlorë pas plagëve të marrë gjatë një konflikti me fqinjin e tij. Dyshohet se sherri në lagjen “11 Janari” në qytetin bregdetar ndodhi për motive pronësie.
“Rreth orës 10:04, pranë një karburanti në lagjen ‘11 Janari’, dyshohet se pas një konflikti për motive pronësie midis 2 shtetasve ka mbetur i dëmtuar rëndë shtetasi Bujar Mehmeti, 60 vjeç, i cili ka ndërruar jetë në Spitalin Rajonal të Vlorës”, njoftoi Policia e Vlorës. Burime policore thanë se 60-vjeçari është goditur me sopatë në kokë.
“Policia ka identifikuar autorin dhe po punohet intensivisht për kapjen dhe arrestimin e tij”, thuhet në njoftimin e Policisë.
Ditët e fundit, një seri krimesh të rënda ndaj jetës, si vrasje dhe plagosje kanë ndodhur në vend. Harta e krimit është shtrirë në disa qytete të vendit. Para dy ditësh, katër viktima u shënuar në dy vrasje të ndodhura në Durrës e Lezhë. Disa persona kanë mbetur të plagosur me armë zjarri apo armë të ftohta po ashtu nga ngjarje të ndodhura në Tiranë, Shkodër, Skrapar e Peqin.
