Kryeministri në detyrë i Kosovës, Albin Kurti thotë se pret që Gjykata Kushtetuese të mos i hapë rrugë krijimit të një qeverie të re dhe se e vetmja zgjidhje për situatën politike janë zgjedhjet e jashtëzakonshme.
Kryetari i VV-së shprehet se, shkelja është shumë e qartë dhe nuk ka se si të ketë vendim tjetër, por për të dërguar çështjen në gjykatë do të pritet publikimi i letrës që Presidenti mandaton LDK-në për të formuar qeverinë si dhe dekretin për Kuvendin. Përveç Gjykatës Kushtetuese, z. Kurti tha se këtë nuk mund ta lejojë as Kryetarja e Kuvendit, Vjosa Osmani.
“Mua mi shkruante nga dy letra në ditë, kurse tash jemi në një situatë kur një letër prej 5 ditësh nuk e publikon. Vjosa Osmani është e vetëdijshme se po përgatitet një shkelje flagrante e Kushtetutës dhe do të përpiqet me çka të mundet për mbrojtjen e Kushtetutës dhe rendit republikan”, deklaroi Kurti.
Kryeministri në detyrë tha se nuk mund të pranonte mandatimin që i bëri Presidenti për të formuar qeveri të re pas rrëzimit për shkak se Kushtetuta parashikon se kur një mocion mosbesimi merr shumicë dhe qeveria rrëzohet, atëherë shkohet në zgjedhje.
“Duhej shpërndarë Kuvendi kur kemi mocion të suksesshëm mosbesimi. Te ne mocionet e mosbesimit e rrezikojnë qeverinë për të shkuar në zgjedhje. Presidenti në Kosovë është një figurë politikisht pasive dhe jo aktive. Duhet të respektojë Kushtetutën dhe nuk mund të provojë vullnet politik ose të udhëheq vullnet politik. Për shkak se bënte shkelje të tilla nuk mund të propozojaas emrin tim. Tani nuk mund t’u thotë humbësve të zgjedhjeve formoni qeverinë. Këto që po ndodhin janë për shkak se u ka ikur treni”, tha Kurti gjatë intervistës në ‘Ilva Now’.
Kryeministri në detyrë tha se e shikonte të pakuptimtë që partitë që votuan mocionin e mosbesimit të mos kërkonin zgjedhje të jashtëzakonshme.
“Ata që kanë incuar rrëzimin duhet të përgjigjen se përse nuk duan zgjedhje. Është ndërprerë zinxhiri i legjitimitet dhe duhet të kthehemi tek burimi i legjitimitetit tek qytetarë pasi është ndërprerë kontrata”, deklaroi kreu i VV-së.
Z. Kurti tha se nuk mund të ketë zgjidhje tjetër politike që do të sillte qëndrueshmëri në Kosovës përvecc zgjedhjeve parlamentare. Madje ai dha dhe një datë se kur mund të organizoheshin këto zgjedhje.
“Mund të mbahen zgjedhje në qershor dhe korrik në varësi se si do të jetë situata e pandemisë. Por ne nuk insistojmë që zgjedhjet të mbahen në kohë pandemie, por jo këto iluzione me Kuvend të vjetër dhe qeveri të re”, deklaroi Kryeministri i Kosovës.
Ai bëri dhe një paralajmërim për ata që po tentojnë të formojnë qeveri, duke thënë se zgjedhjet e 6 tetorit të vitit të kaluar ishin historike për Kosovën.
“PDK doli parti e tretë, kanë fituar dy parti opozitare. Nuk është e mundshme të qeverisësh kundër vullnetit të popullit. Politika nuk është matematike, ku bashkohen copëza të vjetërsuara. Kemi një klub të vjetër që duan të ruajnë privilegje”, tha Kurti.
I pyetur nëse do të bëjë rezistencë nëse arrihet të formohet qeveria e re, Kurti tha se çështja nuk është se nuk kërkon të largohet nga pushteti, por nuk e lejuan as të vinte në pushtet.
“Tashmë në sondazhe jemi 52.8%. Këta e dinë shumë mirë se çfarë i gjen në zgjedhjet e ardhshme prandaj duan t’i shtyjnë ato. Kjo qeveri nuk është për të qeverisur por për të vonuar zgjedhjet, ky është funksioni i tyre.”
“Nuk është puna se nuk po e liroj pushtetin, por nuk më lanë praktikisht të vij në pushtet. I mundëm një nga një por mund t’i mundim dhe të gjithë bashkë. Do t’i drejtohem Gjykatës Kushtetuese pasi janë në shkelje flagrante, prandaj janë në hall të madh dhe nuk arrijnë të bëjnë numrat. Një deputeti tonë i kanë ofruar postin e ministrit. Sa deputetë, aq ministra. Kjo është shprehje e pafuqisë. Nuk jemi të magjepsur nga sondazhet por i përmend se kanë më shumë rëndësi për kundërshtarët. Sondazhet ata i konsiderojnë shumë të rëndësishme”, u shpreh Kurti.
