Vaksina kundër Covid-19 që po zhvillohet në Universitetin e Oksfordit raportohet se ka treguar rezultate premtuese në provat e kafshëve dhe pritet të shohë prodhimin në masë në Indi brenda disa muajsh.
Instituti Serum i Indisë, prodhuesi më i madh në botë i vaksinave sipas vëllimit, tha të martën se planifikon këtë vit të prodhojë deri në 60 milion doza të vaksinës, që është nën provë klinike në Britani.
Serum vendosi të fillojë prodhimin e vaksinës pasi ajo kishte treguar sukses në provat e kafshëve dhe kishte përparuar në teste mbi njerëzit, citohet Shefi Ekzekutiv i Serum, Adar Poonawalla nga “South China Morning Post”.
Injeksionet e para të vaksinës nga Instituti Jenner i Universitetit të Oksfordit në Britani u zhvilluan javën e kaluar. Shkencëtarët po planifikojnë të bëjnë masiv testimin e tyre brenda pak më shumë se një muaji, një kornizë kohore që aktualisht është më e shpejtë krahasuar me përpjekjet e tjera të zhvillimit të vaksinave.
Gazeta New York Times raportoi të hënën se shkencëtarët planifikojnë të testojnë vaksinat e tyre tek më shumë se 6,000 njerëz deri në fund të majit.
Ekipi në Oksford tha se qëllimi i tyre është të prodhojnë një milion doza të vaksinës, nëse rezultojnë efektive, deri në shtator – muaj përpara një afati kohor standard prej 12-18 muajsh të cituar vazhdimisht nga profesionistë të shëndetit në të gjithë botën.
Profesore Sarah Gilbert, drejtuese e ekipit të programit, tha se ajo është “80% e sigurt” se vaksina do të funksionojë. /Boldnews.al/
