Një ditë më parë UEFA vendosi të shpërndante 240 milionë euro për 55 federatat anëtare. Diçka e tillë ishte parashikuar më parë për Programin HatTrick, por ka një ndryshim, pasi paratë mund të përdoren si ta shohin të arsyeshme federatat, në mënyrë që të përballojnë krizën e krijuar nga COVID-19.
Kështu çdo Federatë do të përfitojë nga plot 4.3 milionë euro. Në lidhje me këtë vendim, FSHF-ja, nëpërmjet një postimi në faqen zyrtare mbrëmjen e djeshme, lë të kuptohet se paratë e përfituara nga ky fond, nuk do të shpërndahen kesh për klubet, por organi qeverisës i futbollit shqiptar, do t’i ndihmojë klubet me projekte infrastrukturore.
Njoftimi i FSHF-së:
“Ditën e sotme qeveria e futbollit europian, UEFA, me mbështetjen e byrosë së Komitetit HatTrick, drejtuar nga Kryetari Karl-Erik Nilsson dhe Nën Kryetari Armand Duka, ka prezantuar pranë Komitetit Ekzekutiv të UEFA-s propozimet për të lehtësuar kushtet për përfitimin e fondeve të paracaktuara më parë nga Programi HatTrick, në mënyrë që Federatat anëtare të kenë mundësi financiare për të përballuar vështirësitë e krijuara nga Covid-19.
Buxheti i Komitetit HatTrick, i cili nuk ka pësuar ndryshime apo rritje pas shpalljes së Pandemisë, është miratuar më parë dhe ky vendim i fundit i Komitetit Ekzekutiv të UEFA-s i jep fleksibilitet federatave në përdorimin e këtyre fondeve për ti orientuar sipas prioriteteve të veta në një moment të paprecedent për futbollin në të gjithë botën.
Fondet e Komitetit HatTrick i shpërndahen federatave anëtare të UEFA-s për të mbuluar kostot operative dhe për të ndihmuar në zhvillimin e futbollit vendas nëpërmjet projekteve infrastrukturore.
Duke folur në lidhje me këtë vendim të marrë, Presidenti i UEFA-s, Aleksander Ceferin u shpreh: “Futbolli po përballet me një ndryshim të paprecedentë i cili ka ardhur nga kriza e shkaktuar nga pandemia COVID-19. UEFA dëshiron t’i ndihmojë anëtarët e saj që të përgjigjen në mënyra të cilat janë të përshtatshme në rrethanat e tyre specifike.
Si rezultat, ne kemi rënë dakord që deri në 4.3 milionë euro për secilën federatë, për pjesën e mbetur të këtij edicioni, si edhe për sezonin e ardhshëm. Fonde të cilat mund të përdoren nga anëtarët tanë si ta shohin të përshtatshme në rimëkëmbjen e situatës aktuale të futbollit.
Unë besoj se ky është një vendim i përgjegjshëm për të ndihmuar aq sa ne kemi mundësi. Unë jam krenar për bashkimin që futbolli po tregon përgjatë kësaj krize. Pa dyshim, futbolli do të jetë në zemër të jetës kur të rikthehemi në normalitet. Kur koha të vijë, futbolli duhet të jetë gati”.
