41-vjeçari Aleksandër Përdoda, banor i fshatit Lalm dhe person me precedent kriminal në fushën e krimeve ndaj personit, është arrestuar nga policia pasi dyshohet si autor i vrasje së rapsodit të njohur në Lezhë Kol Murranit dhe Preng Simonit.
Nga hetimet e para, rezulton se ai kishte konflikte pronësie për një tokë me Kol Murranin, i cili dhe dyshohet si shënjestra e këtij atentati. Ngjarja ndodhi mesditën e djeshme në pyllin e fshatit Lalm Luka. “Nga tërësia e veprimeve dyshohet se ky shtetas i ka qëlluar me armë (viktimat) për arsye pronësie, pasi pretendon se pjesa ku ka ndodhur krimi është pronë e tij”, njoftoi policia.
Ndërkohë, në kërkim është shpallur vëllai i të arrestuarit. E.Përdoda dyshohet se ka ndihmuar të vëllanë për fshehjen e provave.
Viktima Kol Murrani nuk rezulton me të shkuar kriminale dhe njihet nga shumë banorë të zonës.
Ngjarja
Kol Murrani bashkë me shokun e tij, Preng Simoni kishin dalë dje që në mëngjes për të shkuar tek shtëpitë e vjetra. Ata u gjetën në një kodër nga i biri i një prej viktimave që ka lajmëruar dhe Policinë. Kjo e fundit, pasi shkoi në vendngjarje, ka gjetur afër vendit të krimit edhe një motorr që dyshohet se i përket autorit të krimit, ndërsa në zonë është gjetur edhe një korrëse bari.
