Tritan Kalo, mjek në Shërbimin Infektiv në QSUT, ishte një ndër të ftuarit e gazetarit Adi Krasta në “A Show” në Syri TV.
Teksa foli për temën e ditës, koronavirusin, dritëhijet e karantinimit dhe vështirësitë e intubimit, mjeku legjitimoi frikën globale ndaj virusit në fjalë.
Sipas Kalos, të sëmurët me koronavirus janë të sëmurë që fillimisht tablonë klinike e kanë të ngjashme me të infeksioneve të tjera, por në ecurinë e tyre mund të pësojnë devianca.
I pyetur nga moderatori i emisionit nëse “ishte e merituar frika globale ndaj Covid-19”, mjeku dha këtë përgjigje:”frikën mund ta shohim në dy plane. Ishe e merituar. Për ç’arsye? Çdo virus i ri me të panjohurat e tij fsheh të panjohura që vijnë duke u zbuluar gjatë ecurisë. Dhe e dyta, fillimet e dy paraardhësve të këtij virusi siç ishin Sars 1 në nëntor-dhjetor të 2002 dhe korrik 2003 ose 2010-11 me Skovin në Arabinë Saudite tregoi se, është një virus shumë agresiv, që mund të japë vdekshmëri të lartë. Dhe frika ishte se i treti virus nga e njëjta familje dhe vdekshmëria e atyre që do të prekeshin do të ishte shumë e lartë. Pra ankthi që shkaktoi dalja e një sëmundje të re ishte i madh”.
I pyetur se si duhet të jetë hapja në Shqipëri, mjeku këshilloi një hapje me faza.
“Unë mbështes një hapje por me faza. Jo të menjëhershme. Mbyllja e menjëhershme e një individi shkakton probleme psikologjike. Tek ne këto ndryshime erdhën njëra pas tjetrës. Ishin pa u shplarë ende problemet e tërmetit. Sidomos moshat e treta dhe fëmijët e vuajnë shumë. Hapja do të kishte shumë kuptime, ajrosjen e trurit dhe çliron ekonominë”, u shpreh Tritan Kalo.
