Një gjest romantik që jep shpresë për të ardhmen. Johhny Fasulo, infermier në repartin e trajtimit intensiv të Covid, në Brianza, Itali, ka përdorur veshjen e tij mbrojtëse që mban gjatë turnit, për ti dërguar mesazh të fejuarës, edhe ajo infermiere.
Propozimi për martesë, është origjinal. Në të vërtetë bëhet fjalë për një konfirmim, ka thënë Fasulo, pasi çifti e kishte vendosur tashmë. Do të martoheshin me 8 qershor, pasi ajo i kishte thënë, Po, nëntorin e kaluar. Mirëpo, emergjenca me coronavirus, i shtyu planet e tyre.
Në veshjen mbrojtëse, ai ka shkruar; “Armida, a do akoma të martohesh me mua, të dua”. Infermeri thotë se e kishte marrë nxitjen për këtë, nga një kolege. Foton e hodhi në Facebook. Ajo më pas u bë virale në rrjet.
Erdhi shumë shpejt, një tjetër PO, nga Armida. Në fillim ajo ishte stepur, pasi është pak e ndrojtur. Më pas është entuziasmuar, dhe e ka falenderuar, tregon Fasulo. Por të dy, nuk e prisnin që kjo histori do të bëhej kaq mediatike, dhe kanë mbetur të surprizuar.
Duke shërbyer të dy në vijën e parë të luftës ndaj coronavirus, Johhny dhe Armida thanë se i kishin harruar shpesh kërkesat dhe shqetësimet personale, duke parë shumë vuajtje në këtë periudhë në spital. Të dy, tashmë të njohur në Itali, janë njohur teksa studionin në Benevento.
