17 raste të reja me COVID-19 janë zbuluar në Kosovë, në 24 orët e fundit, duke arritur në 780 numri në total i të infektuarëve në vend.
Lajmi u bë i ditur nga Instituti Kombëtar i Shëndetësisë Publike në përditësimin e shifrave.
17 persona kanë rezultuar pozitiv nga 226 teste të realizuara.
Rastet e reja pozitive janë raste kontakti me të infektuar të mëparshëm nga: Komuna e Prizrenit: 5 raste, Komuna e Leposaviqit: 3 raste, Komuna e Podujevës: 2 raste dhe nga 1 rast vendbanimet: Prishtinë, Plavë-Dragash, Kotradiq-Pejë, Runjevë-Kaçanik, Reti e poshtme-Rahovec, Suharekë dhe Zveçan.
Lajmi i mirë është se në 24 orët e fundit kanë fituar betejën me COVID-19 edhe 35 pacientë të tjerë duke e çuar në 201 numrin total të të shëruarëve.
Në Kosovë janë 22 pacientë në total që kanë ndërruar jetë për shkak të koronavirusit.
Sot më 27 prill 2020, janë shëruar edhe tridhjetë e pesë (35) pacientë, bazuar në rekomandimet e OBSH-së ku dy mostra rezultojnë negative me së paku një ditë distancë kohore. Numri i përgjithshëm i të shëruarve deri më sot është gjithsej dyqind e një (201) raste.
Sot më datë 27 prill 2020, nga Klinika Infektive është raportuar një (1) rast i vdekjes, i gjinisë mashkull me moshë 53 vjeç me vendbanim në Kotradiq-Pejë dhe i konfirmuar me COVID-19 me datë 27.04.2020. Pacienti është hospitalizuar në Klinikën Infektive me datë 27.04.20 në gjendje shumë të rëndë dhe sëmundje të tjera shoqëruese.
Prej datës 8 shkurt deri më 27 prill 2020, në Laboratorin e Mikrobiologjisë Molekulare në IKSHPK janë testuar gjithsej 6.705 mostra të dyshimta në virusin COVID-19.
