Sulmuesi i Juventusit, Gonzalo Higuain, ka deklaruar se ishte gati të linte futbollin pas humbjes në Finalen e Kupës së Botës në vitin 2014 kundër Gjermanisë.
Pas asaj ndeshjeje, ndaj Higuain vërshuan kritika të shumta, duke qenë se argjentinasi kishte mundësinë të kalonte vendin e tij në avantazh por gaboi në një rast të artë. Duke folur për “Marca” ai tregoi se ajo ishte një periudhë e errët për të, aq sa mendoi dhe tërheqjen nga sporti që ai dashuron, por ishte mamaja e tij e cila i dha kurajon të vazhdonte.
“Isha gati ta lija futbollin, por nëna ime më tha jo dhe se duhet të vazhdoja. Nëse do varej nga unë, do të hiqja dorë. E dua futbollin, por më shumë dua nënën time. Ma tha që nuk do të më lejonte ta lija futbollin për të”.
“Është e vështirë të dëgjosh ai është një dështim, ai nuk mund të luajë futboll “. Dhemb. Mundësia për shënim më erdhi në mënyrë të papritur, unë duhet ta shfrytëzoja atë por për fat të keq nuk munda. Bëra gjënë e parë që më erdhi në kokë. Nuk e di nëse do të bëja të njëjtën gjë tani” – ka thënë Higuain ndër të tjera.
