Nga e Hëna e 27 Prillit, do të rifillojnë shërbimet me taksi vetëm për lëvizjet brenda qytetit. Lajmi konfirmohet nga Drejtoria e Transportit Rrugor, që njofton se shoferë dhe pasagjerë duhet të respektojnë masat dhe protokollet e sigurisë të ndërmarra në situatën e emergjencës COVID-19!
Drejtoria e Transportit Rrugor ka publikuar edhe disa rregulla që duhet të ndiqen në mënyrë që udhëtimi me taksi të jetë i sigurt nga përhapja e COVID:
- Shoferi dhe pasagjeri duhet të jenë të pajisur me maska, doreza dhe dezinfektant! Të shmangen kontaktet fizike!
- Pasagjeri duhet të ulet mbrapa dhe diagonalisht me shoferin e mjetit. Lejohet vetëm 1 klient në automjet. Përjashtim rastet nga e njëjta familje dhe të shoqërimit me të mitur apo persona me paaftësi!
- Kondicioneri duhet të jetë i fikur dhe ajrosja të jetë natyrale. Dritaret e mjetit të qëndrojnë pakëz hapur!
- Mbuloni gojën dhe hundën me një pecetë ose bërryl kur kolliteni apo kur teshtini. Shmangni prekjen e syve, hundës ose gojës me duar të palara.
- Pas pagesës me kartë/cash, shoferi dhe pasagjeri duhet të dezinfektojnë duart.
- Pas çdo pasagjeri, shoferi të dezinfektojë: timonin, dorezat e dyerve të mjetit, sediljet, rripat e sigurimit, kontrollet e dritareve, butonin e bagazhit, etj.
Drejtoria e Transportit Rrugor u bën apel qytetarëve të denoncojnë mosrespektimin e masave të sigurisë.
