Nga BoldNews.al
Një kronikë rutinore televizive tregoi një realitet shumë të hidhur-maskat e skaduara të kompanisë “Farma Net Albania” përdoren në vijën e parë të përballimit me Covid-19.
Televizioni “Klan”, në edicionin e lajmeve të së Enjtes, transmetoi prononcimin e një zyrtareje të Laboratorit të Analizave Serologjike për pacientët e dyshuar si të prekur nga korona-virusi.
Në pamjet e kronikës, drejtuesja e Laboratorit të Analizave mban në fytyrë një maskë e cila, siç duket në video, është një prodhim i kompanisë franceze “Macopharma”. (foto më poshtë është marrë nga videoja).
Këto maska, sipas një bisede publike të administratorit të “Farma Net Albania”, i janë dhënë donacion nga kompania e tij Qendrës Spitalore Universitare “Nënë Tereza”, në Tiranë.
Një përfaqësues i kompanisë franceze “Macopharma”, i vënë në dijeni nga emisioni “Boom” mbi pamjet e maskave që po përdoren aktualisht në QSUT, ka konfirmuar se ato janë të prodhuara nga shoqëria që ai përfaqëson.
Pierre Zurecki nga “Macopharma” konfirmoi gjithashtu se mostrat e maskave që iu treguan nga emisioni investigativ, janë të skaduara që në vitin 2014.
Administratori i kompanisë “Farma Net Albania”, në një bisedë me gazetaren e “Boom” ka pranuar se maskat që janë aktualisht në përdorim në Spitalin Infektiv, janë dhuruar prej kompanisë së tij për QSUT-në, para se të shpërthente pandemia e Covid-19.
Bëhet fjalë për maskat, për të cilat Pierre Zurecki i “Macopharma” deklaroi zyrtarisht se janë skaduar që në vitin 2014.
Pra, duke mbledhur të gjithë episodet, konstatohet qartësisht se mjekët dhe stafi i QSUT-së, i cili gjendet në vijën e parë të frontit për përballimin e Covid-19, është i pajisur me maska të skaduara që në vitin 2014.
“Farma Net Albania” është një prej dy kompanive që u shpallën fitues të tenderit “sekret” në vlerë 3.5 milionë euro për blerjen e pajisjeve mbrojtëse.
Qeveria shqiptare, në 21 Mars 2020, miratoi kontratën ndërmjet Ministrisë së Shëndetësisë dhe bashkimit të operatorëve “Farma Net Albania” dhe “Euromed”, me vlerë mbi 3.5 miliardë lekë të vjetra.
