Nga Boldnews.al
Bashkia e Kavajës ka shpallur bashkimin e operatorëve “G.P.G”shpk dhe ‘Shëndelli” fitues të një tenderit të mbushur me pikëpyetje, për ndërtimin e ujësjellësit të ri të qytetit, i cili kushton rreth 7 milionë euro, së bashku me TVSH.
Fituesi i tenderit ka dhënë një ofertë me vlerë sa 99.8% e fondit limit, ndërkohë që ka qenë konkurent i vetëm, pasi dy “rivalët” e tjerë u skualifikuan për mungesa të theksuara dokumentacioni.
Pikëpyetja 1, tender pa rivalitet
Në fillim të muajit Prill 2020, kryetari i Bashkisë së Kavajës, Redian Krali, njoftoi se bashkimi i operatorëve “G.P.G” shpk dhe “Shëndelli” shpk ishin shpallur fitues në tenderin me objekt “Rikonstruksion i rrjetit shpërndarës për furnizimin me ujë të qytetit Kavajë dhe ndërtimi i depo uji të re, faza e dytë”.
Fondi limit për këtë tender ishte 659,510,733 lekë pa TVSH (rreth 7 milionë euro).
Në tender morën pjesë tre konkurentë; bashkimi i operatorëve “G.P.G shpk & “Shëndelli”; kompania “B93 II” dhe “Alb-Star”.
Në përfundim të procedurave, në garë mbeti vetëm bashkimi i operatorëve ‘G.P.G” dhe ‘Shëndelli”, pasi dy konkurentët e tjerë u skualifikuan.
Sipas dokumentave zyrtare, kompania “B93 II” shpk nuk kishte paraqitur asnjë dokumentacion për të provuar kapacitetin për të ndërmarrë një punë të tillë, siç ishte ndërtimi i ujësjellësit.
Po ashtu, Bashkia e Kavajës skualifikoi edhe konkurentin tjetër, “Alb-Star”, pasi konstatoi se kishte mungesa të shumta dhe domethënëse në destinacion.
Në praktikën e prokurimeve publike, tenderat në të cilët mbetet në garë vetëm fituesi dhe të tjerët skualifikohen, konsiderohen me “flamur të kuq”, me rrisk të lartë abuzimi nga autoriteti kontraktues.
Pikëpyetja 2-“ofertë e mbuluar”?
Bashkimi i operatorëve “G.P.G” shpk dhe “Shëndelli” mund të ishte shpallur fitues, edhe nëse nuk skualifikoheshin dy kompanitë e tjera, për faktin se kishte dhënë ofertën më të ulët.
Por, pikërisht, tek vlerat e ofruara nga operatorët ekonomikë, qëndron edhe pikëpyetja e dytë.
Operatori që ka ofruar vlerën më të lartë ishte “Alb-Star”, me shifrën 659,384,824 lekë të reja pa TVSH, rreth 99 përqind e fondit limit.
Ofertën e dytë më të lartë e kishte “B93” shpk, me vlerën 659,115,596 lekë të reja pa TVSH, shifër e cila përbën gjithashtu 99.9 përqind të fondit limit.
Oferta më e ulët ishte ajo e paraqitur nga “G.P.G” dhe “Shëndelli”, në vlerën 658.284.768 lekë të reja pa TVSH, ose rreth 99.8 përqind e fondit limit.
Shifra e ofruar nga fituesi, megjithëse më e ulta ndër tre konkurentët, krijon gjithësesi dyshime, pasi është vetëm rreth 10 mijë euro më e ulët se fondi limit, që përllogaritet në rreth 7 milion euro.
Referuar këtyre të dhënave zyrtare, nuk përjashtohet mundësia e aplikimit të një skeme, për të cilën Autoriteti i Konkurencës ka aplikuar shpesh gjobitjen e kompanive pjesëmarrëse në tendera publikë.
Skema quhet “ofertë e mbuluar”. Në raste të ngjashme, Autoriteti i Konkurencës ka konstatuar se “operatorët bien dakord më përpara se cili do të paraqesë ofertën fituese, me qëllim që të kualifikohet ai që ka ofertën më të ulët”.
Në një vendim të para disa viteve, Autoriteti i Konkurencës ka konstatuar se, në rastet e “ofertës së mbuluar”, ofertat e paraqitura “janë shumë afër fondit limit dhe lëvizin shumë pak njëra nga tjetra, duke realizuar objektivin e rritjes së ofertës fituese dhe si rezultat, edhe shumës që fituesi i ofertës do të marrë”.
Ky shpjegim, i dhënë në përfundim të një hetimi të Autoritetit të Konkurencës për sjelljen e disa kompanive të automobilave, ka ngjashmëri të lartë me të dhënat e tenderit 7 milionë euro për ndërtimin e Ujësjellësit të Kavajës.
Kompanitë pjesëmarrëse kanë dhënë oferta shumë pranë fondit limit dhe, thuajse shumë pranë njëra-tjetrës.
Dy nga kompanitë, që janë skualifikuar, kanë pasur mangësi të theksuara në dokumentacionin e kërkuar për tenderin, pavarësisht se i kanë pasur të dhënat e qarta, duke i krijuar mundësi kompanisë së tretë që të fitoj tenderin, me vlerë shumë të lartë, rreth 99.8 përqind të fondit limit.
