Ushqimet që plotësojnë nevojat e njeriut janë të larmishme dhe të ndryshme. I tillë është edhe ndikimi i tyre tek hormonet, uria dhe kaloritë e djegura. Në periudhën e epidemisë së COVID-19 dhe në kushtet e karantinimit në banesa, shumë persona kanë filluar të shtojnë peshë, për shkak të rritjes së konsumimit të ushqimeve dhe mungesës së aktivitetit fizik.
Por si të evitojmë kilogramët e tepërt dhe çfarë duhet të hamë në kushtet e një pandemie globale? Në një lidhje direkte me Euronews Albania dietologia Anila Kalleshi, dha disa këshilla të vlefshme.
Teksa theksoi faktin se periudha e izolimit ka qenë e vështirë për të gjithë për shumë arsye, që nga oraret e ndalimit, deri tek mungesa e aktivitetit fizik dietologia nënvijëzon faktin se në këto kushte është rritur niveli i kortizolit, dhe si rrjedhojë edhe ai i stresit.
Kur mendohet të jemi në javët e fundit të këtij izolimi të gjatë, dietologia këshillon që secili të përpiqet të ndryshojë sado pak stilin e jetesës.
“Duhet ndryshim i stilit të jetesës, pra nëse do të ushqehemi shëndetshëm, do stresohemi më pak, do lëvizim më shumë dhe do falim më shumë dashuri, patjetër në distancë, pa dyshim që do të kemi një ndryshim të madh dhe rezultate të mrekullueshme”, tha ajo.
Dietologia rekomandoi përdorimin e perimeve frutave të freskëta dhe të thata si ushqimet më të shëndetshme për të ruajtur imuniteti dhe për të menaxhuar siç duhet stresin e akumuluar.
“Perimet jeshile, përzgjedhim ushqimet e shëndetshme, kushtojnë më pak se ushqimet me yndyrna të shtuara. Frutat dhe perimet vlerat ushqyese të jashtëzakonshme dhe menaxhojnë siç duhet stresin. Tani është periudha e spinaqit, hudhrave të njoma, qepë të njoma, mund të konsumohen duke mos shtuar peshë. Gjithashtu, frutat e thata janë shumë të mirë, drithërat integrale. Përzgjedhim yndyrnat e shëndetshme si vaji i ullirit, avogado etj”, – rekomandon dietologia.
