Zbulohen detaje të reja lidhur me të infektuarin e parë me koronavirus në burgjet shqiptare. I infektuari është një shtetas Italian, i cili është arrestuar nga forcat special të RENEA-s në vitin 2018.
42-vjeçari italian ishte kapur dy vite më parë gjatë një operacioni anti-drogë në qytetin e Durrësit. Mësohet se ai ishte një nga ‘bossat’ e klanit Di Cosimo, një nëngrup i të ashtuquajturës “Camorra barese” me qendër në qytetin e Barit. Për shkak të implikimit të tij me trafikimin e drogë, italiani ishte shpallur në kërkim që prej vitit 2017 për t’u arrestuar në Shqipëri një vit më vonë.
42-vjeçari nuk i shpëtoi drejtësisë shqiptare, pasi pak muaj më parë, më 13 shkurt SPAK i sekuestroi 9 asete pasurore. Mes tyre një fabrikë për prodhimin e lëndëve plastike në Shijak, arë dhe truall me sipërfaqe 5 mijë e 954 m2, 4 makina të markave “Audi”, “Benz” dhe “Range Rover” dhe 2 llogari bankare me vlerë 3 mln lekë dhe 22 mijë €. Ai akuzohej se bashkëpunonte në Shqipëri me B.S., (alias Hakorja), për të trafikuar drogën mes Italisë dhe Shqipërisë.
Tashmë italiani është veçuar nga pjesa tjetër e të burgosurve në burgun 313 për të shmangur një infektim masiv dhe është në pritje të procesit gjyqësor ndaj tij. Gjithashtu tek 313 vuajnë dënimin disa prej ‘kokave të krimit’ në vend si: Emiliano Shullazi, Safet Bajri dhe anëtarët e tjerë të grupit, ‘Niçja i Shijakut’, Aleksandër Murataj etj. Megjithatë asnjë prej tyre nuk ka shfaqur simptoma që lidhen me pandeminë. /Dosja.al
