Të shtëna me armë janë shënuar në vazhdën e një konflikti në një familje në periferi të Tiranës, mbrëmjen e djeshme. Nga të shtënat nuk raportohet për të lënduar, ndërkohë autori është vënë në pranga pas një ndjekjeje nga policia. Ai akuzohet për veprat penale “Dhuna ne familje” dhe “Armëmbajtja pa leje”.
Ngjarja
Burime zyrtare nga Policia bënë me dije se: shërbimet e Komisariatit të Policisë Nr. 6 kanë marrë njoftim se ne fshatin Bulticë, Njësia Administrative Vaqarr, në banesën e shtetasit Sh. L., 64 vjeç, kishte të shtëna me armë. Menjëherë, në drejtim të adresës së dhënë nga qytetarët, janë nisur shërbimet e Policisë.
Në momentin që shërbimet e Policisë janë afruar për të hyrë në banesë, shtetasi R. L., 42 vjeç, djali i shtetasit S. L, ka kërcënuar me jetë punonjësit e Policisë për të mos u afruar në banesë, pasi do t’i qëllonte me armë zjarri. Shërbimet e Policisë i kanë bërë thirrje 42-vjeçarit që të dorëzohej dhe të hidhte armën, por shtetasi R. L. ka mundur të dalë nga banesa nga një dalje dytësore dhe duke përfituar nga errësira është larguar me shpejtësi. Në ndjekje të tij janë vënë forca të shumta të Komisariatit të Policisë Nr. 6 dhe pas disa orë ndjekjeje dhe kontrollesh kanë bërë të mundur kapjen e tij në një banesë të braktisur, si dhe sekuestrimin e armës së zjarrit.
“Shtetasi R. L., pas një konflikti me babanë e tij, shtetasin Sh. L, ka qëlluar me armë zjarri pistoletë në banesë, por pa shkaktuar pasoja. Në përfundim të veprimeve u bë arrestimi i shtetasit R. L., për veprat penale ‘Dhuna ne familje’ dhe ‘Armëmbajtja pa leje’ dhe materialet procedurale i kaluan Prokurorisë, për veprime të mëtejshme”, thuhet në njoftimin e Policisë.
