Robin van Persie është rrëfyer për largimin e tij nga Manchester United pesë vite më parë, duke këmbëngulur se ai planifikonte ta çonte deri në fund kontratën me klubin përpara se të ulej për një takim me “të pamëshirshmin” Louis van Gaal.
Por fatkeqësisht, eksperienca e tij në “Old Trafford” mori një kthesë për keq, kur Sir Alex Ferguson u largua nga klubi.
“Unë bëra këtë bisedë me Louis van Gaal, ku trajneri më tha: Ok Robin, duhet të ndjekim rrugët tona. Unë jam trajneri, ju jeni lojtar, duhet të largoheni. Koha juaj pa kontribut është e gjatë. Unë vijova të sqarohesha: Po, por akoma kam një kontratë! Trajneri ma preu shkurt: Nuk më intereson fare kjo. U tregua i pamëshirshëm. Në fakt, që kur mbërriti trajner te Manchester United, unë konstatova diçka të pakëndshme, por jo kaq të pamëshirshme. Më vrau shumë mënyra si e tha. Shumë gjëra kalojnë në mendjen tuaj, kur merrni një mesazh si ky.
Ende kisha një kontratë, familja ime ishte e lumtur. Ishte viti i 11-të në Angli. Ne donim të jetonim në Angli. Fëmijët e mi po shkonin në shkollë, kishin shokët e tyre dhe gjithçka. Kështu që, në një sekondë të vetme, të gjitha këto gjëra ta kaplojnë mendjen. Si reagova ndaj kësaj? Unë i thashë: Do të shohim se çfarë mund të ndodhë. Ky është mendimi juaj si trajner, por unë kam një kontratë dhe jam i lumtur në Angli, te Manchester United. Kështu që ne do të shohim se çfarë do të ndodh. Aty u ngrita në këmbë, i shtrëngova dorën trajnerit dhe e lashë vetëm.
Gjatë rrugës për në shtëpi po mendoja: Në rregull, duhet ta përballosh situatën edhe pse është e vështirë. Më vriste shumë në zemër pse ma than ë mënyrë kaq të pamëshirshme, të drejtpërdrejtë. Dhe pastaj shumë gjëra erdhën në mendjen time, derisa filluam përgatitjet parasezonale. Unë nuk u lejova të luaja në 11-she. Thjesht më dhanë një top të stërvitesha. U përpoqa të qëndroja i qetë, por mbase në atë moment ishte mirë që të flisja me dikë jashtë rrethit tim të brendshëm. Në fakt isha shumë kokëfortë për ta bërë atë. Tani, nëse e shikoj përsëri, ishin disa momente në karrierën time, ku duhej ta kisha bërë atë”.
“Djajtë e Kuq” e rrëmbyen Van Persien nga skuadra e Arsenalit për 28 milionë euro në vitin 2012, një marrëveshje kjo që rezultoi fantastike për Sir Alex Ferguson, pasi holandezi udhëhoqi skuadrën drejt fitimit të Premier League.
