Piku i koronavirusit në Britaninë e Madhe ishte përpara izolimit.”– u shpreh për Daily Mail një ekspert i njohur, i cili thotë se masat e kufizimeve ishin të panevojshme.
Carl Heneghan, profesor i mjekësisë së bazuar te provat në Universitetin e Oksfordit, ka deklaruar se të dhënat tregojnë që niveli i infektimeve u përgjysmua pasi qeveria nisi të nxiste njerëzit për të larë duart sa më shpesh si edhe rekomandoi mbajtjen e distancës deri në dy metra.
Ndër të tjera ai tha se më vonë qeverisë i doli situata nga duart dhe nxitoi të fuste vendin në karantinë gjashtë ditë pas këshillimit nga shkencëtarë që kanë rezultuar gabim në mënyrë të vazhdueshme gjatë krizës.
Heneghan vlerëson për Suedinë e cila nuk zbatoi karantinën pavarësisht kritikave të ashpra. Në Suedi janë regjistruar 140 raste për 100 mijë banorë, ndërsa në Britani janë 182 raste për 100.000 banorë. Suedia ka 15 vdekje për 100 mijë banorë, kurse Britania ka 24 vdekje për 100 mijë banorë.
Megjithatë Suedia ka ditur të mbrojë ekonominë, teksa më pak se 6 përqind kanë aplikuar për përfitimet e papunësisë. Në Britani kanë aplikuar një e katërta.
“Piku i vdekjeve në Britani ka ndodhur më 8 prill. Nëse e kupton se si funksionon, duhet të kthehesh mbrapa për të parë kur ishte piku i infeksioneve. Kjo do të thotë se ishte 21 ditë përpara kësaj dite, pikërisht pak para izolimit total. Reduktimi me 50 përqind i rasteve ndodhi më 16 mars, pikërisht kur u prezantuan masat e larjes së duarve dhe distancimit social. Nëse e sheh atë që po ndodh në Suedi, ata ruajtën nervat dhe shmangën një skenar apokaliptik”.-shprehet Heneghan.
165,074 persona në të gjithë botën kanë humbur betejën me COVID-19. Ndërkohë rezultojnë të infekuar 2,407,467 qytetarë. Vendet më të prekura janë SHBA-ja, Italia, Franca dhe Spanja. Situata është alamante në Shtetet e Bashkuara të Amerikës, pasi deri më tani janë shënuar 40,565 viktima dhe janë të infektuar 764,265 të tjerë. Po kështu, virusi po bën ‘kërdinë’ edhe në Europë. Në Itali kanë humbur jetën 23,660 persona dhe 178,972 të tjerë janë infektuar. Ndërsa në Spanjë, deri më tani kanë humbur jetën mbi 20 mijë qytetarë.
