Në mëngjesin 27 shtatorit të vitit 1999 kur Kosovës ende i ndihej era barut pas luftës me pushtuesit serb, tokën ‘dardane’ e viziton njëri prej futbollistëve më të mirë në histori.
Luis Nazario da Lima Ronaldo vizitoi qytetin e Gjakovës me misionin e UNDP-së, në kuadër të Programit për Zhvillim të Kombeve të Bashkuara dhe të Karitasit të Belgjikës.
Sulmuesi brazilian u prit nga mijëra qytetarë të Gjakovës, derisa u shoqërua nga autoblindat e KFOR-it italian. Ish-sulmuesi i Barcelonës, Real Madridit, Interit, Milanos dhe disa skuadrave të tjera të njohura gjithashtu dhuroi 30 mijë dollarë donacion.
Ardhjen e Ronaldos në Kosovë e ka ndjekur nga afër gazetari i njohur kosovar Xhavit Kajtazi. Ai së bashku me fotografin Ridvan Slivova kanë arritur të depërtojnë në mesin e dhjetëra personave dhe të realizojnë edhe intervistë me të.
Pas më shumë se dy dekadash, Kajtazi është rikthyer të flas për njërën ndër intervistat më të famshme të asaj kohe dhe këtë ekskluzivisht për gazetën “Sheshi”.
Sheshi: Ju ishit gazetari i vetëm shqiptar i cili arritët ta intervistonit Ronaldon gjatë vizitës së tij në Gjakovë. Na flisni diçka më shumë rreth kësaj ngjarje dhe vështirësitë e realizmit të kësaj interviste?
Kajtazi: “Me emra të mëdhenj të sportit asnjëherë nuk do të hasësh në vështirësi, ngase të gjithë, pa përjashtim vlerësojnë gazetarët. Të gjitha proceset që u zhvilluan deri te realizimi i bisedës kanë zgjatur pothuasje një muaj. Redaksia e sportit e gazetës “Rilindja” u vizitua disa herë nga menaxherët e kësaj ngjarjeje dhe një javë para ardhjes së Ronaldos në Prishtinë gjithçka ka qenë gati. Unë së bashku me fotoreporterin e gazetës “Rilindja”, Ridvan Slivova, patëm fatin që të jemi në helikopterin e KFOR-it së bashku me Ronaldon (atë kohë 22 vjeç), babain tij Neilo Lazario da Lima (asokohe 60 vjeç)”.
Sheshi: Cilat ishin të veçantat e kësaj interviste?
Kajtazi: “Meqë isha në grupin e ngushtë të realizimit të këtij misioni, më 27 shtator 1999 iu ofruam shkallëve të aeroplanit. Pikërisht në orën 14, nëse nuk gabohem, Ronaldo preku tokën e Kosovës i shoqëruar nga organizatorët e këtij misioni bamirës, Bernar Kushner, administrator i Kosovës e të tjerë. Derisa helikopteri fluturoi nga Prishtina për në Gjakovë, shfrytëzova rastin që t’i paralajmëroj bisedën me brazilianin, asokohe të Interit te Milanos, gjë që edhe ia arritëm, pavarësisht se në programin e ekspeditës bamirëse nuk ishte paralajmëruar asnjë bisedë me gazetarët. Madje, nga ky mision arrita të bisedojë edhe me babain e Ronaldos që ishte një inxhinier i makinerisë, i cili ishte tejet i emocionuar nga ajo që pa në oborrin e shkollës “Mustafa Bakia” në Gjakovë, ku i biri tij ua dorëzoi ndihmën në shumë prej 30 mijë dollarë, të cilën e pranoi drejtori Iljaz Daija”
Sheshi: Si arritët ta realizonit këtë intervistë dhe sa kohë ju mori?
Kajtazi: “Gjithçka nisi dhe u mbyll për dhjetë ditë kontakte e takime pune me organizatorët e këtij misioni bamirës. Paraprakisht u hartua axhenda, nga e cila për asnjë minutë nuk pati ngecje. Gjithçka që ndodhi për dy-tri orë qëndrimi në Kosovë, na u duk se zhvillimet po mbylleshin për pesëmbëdhjetë minuta”.
Sheshi: Cila ishte jehona e kësaj intervistë apo përmasat që mori më vonë vizita e Ronaldos në Gjakovë menjëherë pas përfundimit të luftës?
Kajtazi: “Vizita historike e futbollistit më të mirë në botë të cilën zyrtarisht po e mbulonin “Eurosporti” vetëm dy muaj pas përfundimit të luftës në Kosovë, bëri bujë shumë të madhe. Për ardhjen e tij në Kosovë kanë raportuar të gjitha mediet e shkruara dhe elektronike gjithandej Botës. Takimi me fëmijët e Lufës së Kosovës, ishte shumë prekës dhe i jashtëzakonshëm. Unë shfrytëzova rastin pak para largimit nga Kosova që të bisedojë edhe me babain e Ronaldos Nelio Nazario da Lima dhe nga kjo intervistë mësova se babai i Fenomenit kishte shitur tërë pasurinë për të investuar në djalin e tij, i cili nga ekspertët ishte vlerësuar lart, gjë që edhe doli të jetë e vërtetë”.
Sheshi: Përveç ‘Fenomenit’, cilët kanë qenë sportistët e tjerë të famshëm me të cilët keni patur rastin të takoheshit dhe të zhvillonit intervista?
Kajtazi: “Kanë qenë në Kosovës menjëherë pas luftës edhe shumë emra sportisësh e artistësh nga Bota dhe redaksia jonë vazhdimisht ka përcjellur ngjarjet e tilla madje edhe përmes intervistave. Kanë qenë Laudrup, Tigana, Shtefi Graf e të tjerë”. /gazetasheshi/
