Ministri i Sportit, Vincenzo Spadafora, ka deklaruar se së shpejti mund të konfirmohet data 4 maj për rikthimin në stërvitje të skuadrave të Serie A.
Urdhri nga qeveria Italiane për mbylljen e çdo aktiviteti skadon në datën 3 maj dhe besohet gjerësisht se deri në atë kohë, Italia do të hyjë në fazën e dytë të pandemisë së coronavirusit.
Kjo do të thotë që do të bëhen disa lëshime dhe atletët mund të lejohen të rikthehen në stërvitje.
“Javët e ardhshme do të jenë thelbësore për të kuptuar situatën në të cilën ndodhemi, nëse dhe kur mund të rikthejmë aktivitet sportive në të gjitha nivelet”, – ka thënë Spadafora mbrëmjen e djeshme.
“Shpresojmë se do të konfirmojmë datën 4 maj për të rikthyer skuadrat në stërvitje. Shpresojmë ta realizojmë këtë. Në këtë moment, shqetësimi ynë i vetëm duhet të jetë vetëm shëndeti dhe siguria e të gjithë popullatës”.
Deri në këto momente në Itali numërohen 22,170 të vdekur nga COVID-19, ndërsa numri i rasteve aktive është 106,607 me 2,936 persona në gjendje kritike për jetën.
