Kryeministri Edi Rama vijon të marrë rolin e protagonistit në situatën e krijuar nga Covid-19. E ndërsa më parë ka luajtur rolin e mjekëve, virologëve, gjeneralit të luftës, ekspertit të shëndetit publik, ekonomistit, policit, sot ai ka marrë rolin e një agjenti udhëtimesh.
Në fillim të epidemisë së Covid 19, Rama u shfaq si “gjenerali” që i shpalli luftë koronavirusit, që e quajti një “armik të padukshëm”.
Pas dy javësh nga ky moment, ku më tepër përhapi frikë dhe panik se sa dha garanci dhe qetësi, ai u shfaq rrugëve, duke i kërkuar llogari njerëzve që dilnin për pazare.
Më pas jepte këshilla si mjek, duke u kërkuar qytetarëve të lajnë duart, mos mbajnë maska dhe doreza, edhe pse më pas doli se maska dhe doreza duhej të mbaheshin, madje sot nuk lejohet që në tregje të futesh për të blerë pa maske dhe doreza.
Ndërsa ka njoftuar për nisjen e prenotimeve në avionët e Air Albania për atë që e quan “operacioni humanitar” për riatdhesimet e shqiptarëve që kanë mbetur prej javësh në vende të ndryshme europiane, Rama ka bërë të njohura edhe paketat, avion+hotel që ata duhet të paguajnë.
Kështu Rama shkruan se bileta e udhëtimit është 100 euro, ndërsa akomodimi në hotel për 1 natë është 21 euro, por 14 euro do të mbulohen nga Qeveria.
Qytetarët që do të riatdhesohen do të jenë të detyruar të qëndrojnë në hotele për 14 ditë nën mbikqyrjen e rreptë të policisë.
Tashmë kryeministrit nuk i ka mbetur ndonjë rol pa luajtur, përveçse ndonjë ditë të shfaqet duke kuruar pacientë në spital, duke shpërndare vetë pako me ndihma, një rol që duket se ia ka zënë Erion Veliaj, apo si shofer auto-ambulance, duke transportuar të sëmurët me Covid-19.
NJOFTIMI I RAMES
SOT HAPEN PRENOTIMET PËR FLUTURIMET E RIATDHESIMIT QË NISIN TË SHTUNËN NGA ROMA
PAKETA DO TË JETË 100€ PËR FLUTURIMIN QË DO TË PAGUHEN NGA PERSONI DHE 21€ NË DITË PËR AKOMODIMIN 14-DITOR NË HOTEL, PREJ TË CILAVE 14€ DO TË MBULOHEN NGA QEVERIA PËR FJETJEN E SHËRBIMIN, NDËRSA VETËM 7€ DO TË PAGUHEN NGA PERSONI PËR USHQIMIN
BESOJ SE KJO PAKETË ËSHTË MËSE E ARSYESHME E FALENDEROJ AIR ALBANIAN DHE OPERATORËT TURISTIKË PËR MIRËKUPTIMIN DHE KONTRIBUTIN E TYRE ME ZEMËR SHQIPTARE NË KËTË NISËM ASPAK TË LEHTË, PËR SITUATËN E NDËRLIKUAR QË PO KALOJMË
#njëAtdhe ???????? #njëFamilje
*çmimi i biletës do të variojë sipas destinacioneve, ndërsa pagesa e hotelit karantinë do të jetë fikse për të gjithë natyrisht
