Gjashtë persona janë vënë në pranga dhe dy të tjerë janë proceduar penalisht në 24 orët e fundit nga shërbimet e policisë.
Burime zyrtare bëjnë me dije se në Tiranë është arrestuar shtetasi A. Q., pasi drejtonte mjetin në gjendje të dehur, në masën 1.32 mg/l. Si dhe shtetasi M. H., pasi është konstatuar duke drejtuar mjetin në gjendje të dehur dhe nuk i është bindur urdhrit të punonjësit të Policisë për të ndaluar.
Në Durrës është arrestuar shtetasi E. F., banues në Krujë, pasi drejtonte mjetin pa leje drejtimi, në gjendje të dehur në masën 0.53 mg/l dhe në kundërshtim me Aktin Normativ.
Gjithashtu, në Durrës është proceduar në gjendje të lirë dhe shtetasi A. B., pasi duke drejtuar mjetin, nuk i është bindur urdhrit të Policisë për të ndaluar.
Në Elbasan është arrestuar shtetasi A. K., banues në Përrenjas, pasi është konstatuar duke drejtuar mjetin në gjendje të dehur, në masën 0.89 mg/l.
Në Dibër janë arrestuar shtetasit M. M. dhe D. D., pasi shtetasi M. M. drejtonte mjetin nën efektin e alkoolit, jashtë orarit të lejuar dhe në bashkëpunim me shtetasin D. D. ka kundërshtuar me dhunë punonjësit e Policisë.
Në Vlorë është proceduar penalisht për fshehje të ardhurash, shtetasi B. H., banues në Dhërmi, Himarë, sepse, pas kontrollit të ushtruar në minimarketin që ai administronte, u konstatua mungesë dokumentacioni dhe moslëshim i kuponit tatimor.
