Nga Boldnews.al
Në spitalet e vendit, në urgjencat shtetërore dhe poliklinika, mjekët dhe infermierët mbajnë nën hundë maska të skaduara që në vitin 2011. Virusi shpesh i ka kapur, edhe për shkak të mungesës së mjeteve mbrojtëse, por ata mbesin vetëm një statistikë më shumë në vargun e të infektuarave me COVID-19. Halli është në tjetër vend.
Alarmi i madh ka kapur institucionet e vendit, sesi duhet të mblidhen 122 koka të “mëdha” deputetësh dhe deputetesh në një sallë, për të votuar ca ligje të forta që dënojmë me burg qytetarët karantinëshkelës.
Me urgjencë u hap tenderi sot për 180 maska dhe xhel dizinfektues për të ruajtur “pasurinë e kombit”, parlamentarët tanë. Kuvendi kërkon të blejë 250 copë material denzifektantë, xhel për duart, vitaminë E, Aloe Vera, trietsnolamine e alkoletilik dhe 180 maska.
Në dokument, thuhet se afati i konfirmimit të procedurës së prokurimit është 2 orë nga momenti i njoftimit të fituesit. Kryetari i Kuvendit porositi anëtarët e Këshillit dhe shërbimet e Kuvendit edhe për matjen e temperaturës së deputetëve para hyrjes në sallë.
Kreu i Parlamentit i ka rënë disi shkurt, deputetët tanë meritojnë më shumë se kaq dhe ne të gjithë qytetarët, edhe ata që kanë 2 mijë lekëshin e fundit në xhep, duhet të kontribuojnë për njerëzit që na përfaqësojnë kaq denjësisht, edhe në këtë kohën e “kolerës së shekullit XXI”.
Deputetët tanë e kanë të justifikuar jo vetëm xhelin për sterilizim perfekt, por një special për flokët e tyre, madje “xhel lubrifikant” për… duart, që tu rrëshkasin lehtë kur të hedhin votën për dënimin e qytetarëve të pabindur dhe tradhtarë të kësaj “lufte të tmerrshme imagjinare”.
Nga ana tjetër, deputeteve gra u nevojitet edhe një krem për fytyrën, nga ata të bëra me qumësht gomarice (si Kleopatra në kohët e lashta). Tu shkelqejë fytyra dhe të duken aq të fisme, pasi po dalin nga shtëpitë në këto kohë të vështira për të “mbrojtur” jetët tona. Vitamina dhe tableta për të qenë aktiv në gjithçka.
Maskat duhen speciale, ndaj janë ende në kohë që të kërkojnë edhe më shumë se kaq. Të hapin një tender ndërkombëtar për mallra dhe produkte sa më cilësore, pavarësisht se është kohë krize. E meritojnë të kenë maska nga ato që mbajnë profesorët që punojnë në laboratorët antiviruse.
Siguri absolute për ta. Maskat dhe xhelin e duarve, madje edhe vitaminën E duhet ti sigurojë institucioni i Parlamentit, duke futur duart edhe për mbrojtjën e fytyrës së tyre nga taksat e qytetarëve. Ndoshta nuk janë në gjendje që të blejnë një maskë, apo mund të kenë alergji nga sapuni, ndaj nevojitet një xhel special për duart e tyre të “pastra”.
Kanë një jetë të “vështirë”, rreth 2.2 milionë të vjetra është paga neto mujore për deputetët, karburant e telefon pa limit. Udhëtime jashtë vendit, pagesa ekstra dhe ndërhyrje për tendera publikë. Dyert e çdo institucioni i hapin vetëm me kartën e deputetëtit. Imunitet në rrugë dhe kudo. Sërish nuk mjaftohen. Pikërisht në ditën që do të votojnë për ndryshimet në Kodin Penal që ashpërson dënimin e qytetarëve që shkelin karantinën në kohën e pandemisë së coronavirusit bëhet një tender për të siguruar deri në detaje jetët e tyre.
E sigurt se nuk do i gjejë gjë, edhe njëri që u prek nga “COVID-19” dhe fatmirësisht u shërua ishte deputeti ballist Adriatik Alimadhi, asnjë socialist që i paçim me jetë të gjatë, asnjë i majtë, asnjë deputet tjetër i vëtshpallur opozitar. Edhe virusi i do shumë, aq sa nuk i kap të singjashmit…!
