Ish-banori i “Big Brother” Petrit Bylykbashi e ka mposhtur virusin COVID-19 dhe ka dalë negativ në testin e radhës.
Lajmin e ka dhënë vetë Bylykbashi në një njoftim në rrjetet sociale ku thekson se do të qëndrojë edhe 14 ditë i izoluar, duke respektuar rregullat e Institutit Kombëtar të Shëndetit Publik.
Ai madje shprehet se do t’i bashkohet grupit të vullnetarëve në Konviktet e Prishtinës ku janë karantinuar me qindra persona të dyshuar me koronavirus.
“U shërova. Sot, 18 ditë mbas rezultatit pozitiv të COVID-19, 24 ditë mbas shfaqjes te simptomave dhe 38 ditë nga koha kur dyshohet se jam infektuar, rezultova për herë të dytë rresht (në ditë të ndryshme) negativ në testin COVID-19, konsiderohem i shëruar total. Sipas rekomandimit të Institutit Kombëtar të Shëndetësisë, unë do rri edhe për 14 ditë të tjera i vetëizoluar, e pastaj do i kthehem ‘normalitetit’ dhe do i bashkangjitem grupit të vullnetarëve në Konviktet e Prishtinës”.
Bylykbashi bëri me dije javën e kaluar se nuk e di nga u infektua, pasi ka pasur kontakte me shumë njerëz. Ai ka pasur simptoma të tilla si dhembje, kollë e thatë, shtrëngim në gjoks, por jo ethe apo temperaturë.
