Nga Rich Karlgaard
Ndërsa ky shkrim u nis për shtyp, infeksione të reja të Covid-19 dhe frika ekonomike vetëm sa shtohet në të gjithë botën. Pas Italisë edhe shumë vende të tjera u futën në bllokim. Tregjet e aksioneve në SHBA morën tatëpjetën që në shkurt. Aktivitetet publike, sportive dhe ata të biznesit i përkasin tashmë një të shkuare disajavore. Në mes të gjithë kësaj, Rusia, Arabia Saudite dhe Emiratet e Bashkuara Arabe vendosën të shtojnë me katër milion fuçi nafte në ditë prodhimin. Për pasojë çmimet e naftës dhe gazit natyror kanë kapur nivele të ulta historike.
Ku e ka fundin e gjithë kjo? Parashikimi afatshkurtër tani nuk mund të bëhet më sa kohë në lojë është aktori plotësisht i ri në fushën ekonomike: virusi. Sa i transmetueshëm është ai? Cili është niveli i vdekshmërisë në grupe të ndryshme popullsie? Cilat politika janë më të mirat për të ngadalësuar përhapjen e tij? A do të ngadalësohet infeksioni me ngrohjen e motit në hemisferën veriore? A do të zgjerohet pandemia në Amerikën e Jugut dhe Afrikë në vjeshtë? Kur do të kemi një vaksinë?
Askush me dy pare mend nuk pretendon të ketë një përgjigje për këtë mori pyetjesh. Në kushtet e një pasigurie të plotë dhe në mesin e panikut të Covid-19, le ta lejojmë veten të bëjmë një parashikim ndryshe. Shkojmë direkt në pranverën 2021 dhe prej aty shohim se si do të na duket bota. Janë thjeshtë pesë parashikime për vitin 2021:
Rritja globale do të jetë 4%, pasi kërkesa për prodhimin e vaksinave të reja fuqizoi rritjen globale të PBB-së për vitin 2020 me 1.2%. Kina do të ketë një vit të qëndrueshëm me rritje 6%, nga 2.8% që pati në vitin 2020. Kina do të përfitojë nga mbajtja e rezervave të naftës me çmime të lira në vitin 2020. Por ka edhe erëra të tjera që fryjnë në favor të Kinës. Covid-19 përshpejtoi një ribalancimin e rrjeteve të furnizimit global të Kinës drejt Brazilit, Indisë, Meksikës dhe Azisë Juglindore. Kjo do të mbështesë potencialin e rritjes së Kinës në vitet në vazhdim. SHBA do të kthehet në ritmet e rritjes pas mungesës së saj në vitin 2020. Rritja 3% në vitin 2021 do të ringjallë inflacionin, një e keqe e harruar për një kohë të gjatë.
Udhëtimi global do të rifillojë në kapacitet të plotë. Ata që parashikuan se Covid-19 do të sillte një mënyrë të re jetese, bazuar në telekonferenca, argëtim virtual dhe akoma më shumë tregti online – Nesting 3.0 – duhet të shikojnë se ky mësim u harrua shpejt. Kjo do të thotë se natyra njerëzore nuk ndryshon aq shumë. Njerëzve u pëlqen të udhëtojnë dhe të grumbullohen. Të mërzitur nga mbyllja e gjatë, ata ndjejnë nevojën për të dalë dhe ecur.
Start-up e shumta do të bëhen një specie e rrezikuar. Në të gjithë botën, por kryesisht në SHBA dhe Kinë, ka më shumë se 500 nga këto startupe “amtare dixhitale” të financuara nga kapitali i sipërmarrjeve të mëdha. Në mënyrë kolektive ato janë vlerësuar në mbi 2 trilion dollarë. Por këtu qëndron edhe hileja e madhe: shumica e të mëdhenjve të biznesit kanë shpenzuar më shumë sesa patën të ardhurat. Në një treg të aksioneve në rritje, investitorët privatë nuk interesohen më për risitë. Basti i tyre, në fund të fundit, ishte në potencialin e të mëdhenjve të biznesit. Por rënia e tyre në tregjet e aksioneve, zvogëlon horizontin e investitorëve shpejt.
Politika e majtë do të bëhet më ekstreme në 2021. Në SHBA, recesioni i vitit 2020 u ndje si një fatkeqësi financiare për punëtorët me kohë të pjesshme. Megjithëse të majtët Jeremy Corbyn, në 2019, dhe Bernie Sanders në 2020, nuk arritën të zgjidhen, lëvizjet e tyre po rriten, fryti i hidhur i shkundjes së 2020.
Kthehet Inflacioni. Donald Trump, i shqetësuar për rizgjedhjen e tij, shkarkoi kreun e Rezervës Federale në verën e vitit 2020. Kreu i ri i Rezervës Federale është një mbështetës i flaktë i teorisë moderne monetare. Me një aftësi praktike të pakufizuara për të printuar para, si një premtim zgjedhor për të shpenzuar triliona dollarë në infrastrukturën e re, Trump arriti të rizgjidhet. Ekonomia e vitit 2021 hyri në ngërç monetar. Inflacion kapi shifra të papara në dy dekada. Kjo është me pak fjalë historia e biznesit e vitit 2021! /Forbes
/Përktheu: Mapo.al/
