Cristiano Ronaldo dhe shokët e tij të skuadrës, kanë hequr dorë nga gjysma bonusit të kualifikimit në Euro 2020, për të ndihmuar futbollin amator portugez.
Pas përhapjes së coronavirusit, futbolli i ligave të ulëta është në krizë dhe shumë futbollistë nuk marrin pagat e tyre. Federata Portugeze e Futbollit, bëri të ditur ditën e sotme, se paratë do të shkojnë drejt një fondi që shpresohet se do të arrijë shifrën e 4.7 milionë eurove.
Javën e kaluar federata vendosi t’i jepte fund përfundimisht sezonit amator të futbollit, duke deklaruar gjithçka të pavlefshme, pa shpallur kampionë. Tashmë vëmendja është kthyer në ndihmën financiare ndaj klubeve dhe futbollistëve.
Për sa i përket futbollit profesionist në Portugali, akoma nuk është marrë asnjë vendim, por presidenti i Primeira Liga, në fundin e marsit deklaroi se është i vendosur ta çojë sezonin deri në fund.
