Prej më shumë se 1 muaji në Shqipëri po aplikohen masat ekstreme për të mos lejuar përhapjen e koronavirusit.
Me qindra biznese të vogla prej datës 8 mars, në bazë të Akteve Normative të Qeverisë, nuk zhvillojnë aktivitetet, ndërsa të vetë-punësuarve, ose ato që kanë humbur vendin e punës, janë në pritje të asaj që Kryeministri Edi Rama e ka cilësuar si “paga e luftës”.
Ndërkohë mes aktiviteteve që lejohen të ushtrojnë aktivitetin është edhe ndërtimi. E ndërsa pjesa më e madhe e shqiptarëve janë të detyruar të qëndrojnë në karantinë, apo të lëvizin vetëm 90 minuta brenda fashës së lejuar të qarkullimit, punëtorët e ndërtimit nuk e njohin këtë masë.
Fotot e mëposhtme tregojnë se punëtorët e firmës Albstar vijojnë punën normalisht në projektet, njëri në Berat dhe tjetri në Kuçovë.
Pavarësisht maskave që mund të mbajnë, ajo që bie në sy është fakti se distancimi social, ajo që trumpetohet me forcë nga specialistët dhe më pas edhe nga drejjtuesit e qeverisë, nuk respektohet.
Pavarësisht deklaratave se deri më sot nuk ka asnjë punëtor në kantieret e ndërtimit, sikundër quhen, fakti se testet janë të kufizuara, ngre dyshimet se konkluzione të tilla duhen marrë me rezerva.
