Orges Bilbili është njohur me masën e sigurisë në spitalin e Traumës, aty ku është shtruar prej dy ditësh, pasi u plagos në këmbë nga një efektiv i repartit Shqiponja.
Bilbilit iu komunikua masa e sigurisë “arrest me burg” nga gjyqtari Kujtim Vranici, i cili pranoi kërkesën e prokurorit Petrit Hysi.
Bilbili nuk ka pranuar të japë dëshmi një ditë më parë për oficerët e policisë gjyqësore, duke u thënë se do të flasë në një moment të dytë.
Ndaj Bilbilit rëndojnë akuzat e vrasjes së mbetur në tentativë dhe armëmbajtje pa leje.
Avokati i Bilbilit, Erjon Kulloli, tha se klienti i tij ndodhet në një gjendje jo të mirë shëndetësore dhe gjatë seancës mbajti qëndrim neutral.
Orges Bilbili, i shpallur në kërkim prej 3 vitesh, u përball të premten me një efektiv policie, në rrugën Sitki Çiço, atje ku kishte marrë një banesë me qira.
Oficeri i policisë i ka kërkuar Bilblit lejen e daljes, në respekt të aktit normativ që detyron qytetarët që të marrin leje të posaçme për të dalë nga banesa në orarin e lejuar të fashës së lëvizjes, si dhe një mjet identifikimi.
Bilbili i është shmangur punonjësit të policisë, ndërsa ky i fundit e ka ndjekur me vrap në një rrugicë, duke u përballur, sipas dëshmive të efektivit të Shqiponjave, me kanosjen me armë zjarri, nga 30-vjeçari që cilësohej me rrezikshmëri të lartë.
Sikundër është deklaruar zyrtarisht nga policia, efektivi ka qëlluar në ajër me armë zjarri dhe më pas ka plagosur Bilbilin në gjymturët e poshtëm. Fatkeqësisht nga qitjet e policit është plagosur edhe një 30 vjeçare, kalimtare e rastit e cila ka marrë dy plumba, një në këmbë dhe një në shpatull.
Po kush është Orgest Bilbili?
Ai dyshohet për atë që njihet si masakra e Lushnjes, ku mbetën të vrarë dy persona dhe u plagosën dy të tjerë.
Ngjarja ka ndodhur në 11 shtator 2017 dhe prej atëherë, Orgest Bilbili ishte i shpallur në kërkim.
Forcat operacionale të Policisë së Shtetit, Renea dhe FNSH kanë organizuar disa operacione për arrestimin e Bilbilit, por pa arritur t’a kapin.Gjithashtu për masakrën e Lushnjes është akuzuar edhe Laert Haxhiu.
Laert Haxhiu është akuzuar dhe si autor i vrasjes së 29 vjeçarit Gerti Lala.
Ngjarja ku i riu që njihej me nofkën “Iriqi” mbeti i vrarë, ndodhi më 8 korrik të vitit 2010. Për këtë krim, Laert Haxhiu u dënua me 32 vjet burg, por me vendim të Gjykatës së Apelit ai u lirua pas tri vitesh. Lirimi i tij u argumentua me mungesën e provave.
Pasi doli nga burgu në fund të 2014-s, ai u arrestua sërish në qershor të vitit 2015 në Durrës, për trafik heroine, gjatë operacionit të koduar “Smart”, ku u sekuestrua një sasi prej 1.2 kg heroinë.
Ndërkaq, bashkëpunëtori i Haxhiut në vrasjet Lushnjë në 2017, Orges Bilbili, rezulton se është dënuar me 7 vite e 4 muaj burgim për trafikim lëndësh narkotike. Bashkë me Haxhiun, Orges Bilbili është i dyshuar edhe për atentatin, ku u plagosën Xhulio Shkurti (nipi i Aldo Bares) dhe Sajmo Xhelili.
Bashkë me dy të plagosurit ka qenë edhe Zamir Latifi, i cili asokohe nuk pësoi plagë.
